Crime News: మైనర్‌ ఘాతుకం.. 58 ఏళ్ల మహిళపై అత్యాచారం.. ఆపై హత్య!

భోపాల్‌: మధ్యప్రదేశ్‌(Madhya Pradesh)లోని రేవా(Rewa) జిల్లాలో దారుణం వెలుగుచూసింది. రెండేళ్ల క్రితం నాటి ఓ చోరీ ఘటనను మనసులో పెట్టుకున్న 16 ఏళ్ల బాలుడు.. అందుకు ప్రతీకారంగా 58 ఏళ్ల మహిళపై దాడి చేసి, అత్యాచారానికి పాల్పడ్డాడు. ఆపై కొడవలితో నరికి హత్యచేశాడు. పోలీసుల వివరాల ప్రకారం.. ఇక్కడి ఓ గ్రామంలో బాధితురాలి కుటుంబం నివసించేది. పొరుగింట్లో నిందితుడు ఉండేవాడు. ఈ క్రమంలోనే ఇటీవల మహిళ ఇంట్లో ఒంటరిగా ఉండటం గమనించి.. లోపలికి ప్రవేశించాడు. మంచంపై నిద్రపోతున్న ఆమెపై దాడి చేశాడు. ఆమె కేకలు వేసేందుకు యత్నించగా.. నోట్లో పాలిథిన్ కవర్లు, గుడ్డలు కుక్కాడు. తాడుతో ఆమె ముఖంపై ప్లాస్టిక్ సంచి కట్టేశాడు. అనంతరం భవనంలో నిర్మాణంలో ఉన్న భాగానికి ఈడ్చుకెళ్లాడు.

అక్కడ ఆమెను ఓ డోర్‌కు కట్టేసి.. మళ్లీ దాడి చేశాడు. ఊపిరాడక స్పృహ కోల్పోయిన ఆమెపై అత్యాచారానికి పాల్పడ్డాడు. ఆపై కొడవలితో నరికి చంపేశాడు. అనంతరం ఆమె ఇంట్లో రూ.వెయ్యి నగదు, నగలు తీసుకుని పరారయ్యాడు. హత్య సమాచారం అందుకున్న పోలీసులు కేసు నమోదు చేసుకుని, దర్యాప్తు ప్రారంభించారు. ఈ క్రమంలో పొరుగింట్లో నివసించే బాలుడిపై అనుమానం రావడంతో.. అతన్ని పట్టుకుని విచారించగా, అసలు విషయం బయటపడింది. అతను రెండేళ్ల క్రితం టీవీ చూసేందుకు తమ ఇంటికి తరచూ వచ్చేవాడని, ఓసారి మొబైల్ ఫోన్ చోరీ చేశాడని మహిళ కుటుంబ సభ్యులు చెప్పినట్లు పోలీసులు తెలిపారు. ఈ ఆరోపణలను అవమానంగా భావించిన బాలుడు.. ప్రతీకారంగా ఈ దారుణానికి పాల్పడినట్లు చెప్పారు.