Robbery: కుమారుడికే కత్తి పెట్టి.. దోపిడీకి యత్నించి..!

లండన్‌: తేలికగా డబ్బు సంపాదించాలి అనుకున్న ఓ వ్యక్తి.. అనుకోకుండా సొంత కొడుకునే దోచుకునేందు(Robbery)కు యత్నించి జైలు పాలైన ఘటన ఇది. స్కాట్లాండ్‌(Scotland)లోని గ్లాస్గో(Glasgow)లో చోటుచేసుకుంది. ఓ 17 ఏళ్ల యువకుడు స్థానికంగా ఓ ఏటీఎంకు వెళ్లి నగదు తీసుకున్నాడు. అంతలోనే ముసుగు ధరించిన ఓ వ్యక్తి లోపలికి ప్రవేశించి.. అతన్ని వెనుకనుంచి అదిమి పట్టి, మెడపై కత్తి పెట్టాడు. నగదు ఇవ్వాలంటూ బెదిరించాడు. అయితే, నిందితుడి గొంతును గుర్తుపట్టిన యువకుడు.. వెంటనే అతన్ని తన తండ్రిగా గుర్తించాడు. ‘నిజంగా ఈ పని చేస్తున్నారా? నన్ను గుర్తుపట్టారా?’ అని ప్రశ్నించాడు.

అయితే, ఇవేమీ పట్టించుకోనని నిందితుడు చెప్పాడు. ఈ క్రమంలోనే వెనుకకు తిరిగిన యువకుడు.. తండ్రి ముసుగును లాగేశాడు. దీంతో ఇప్పటివరకు తాను కత్తి పెట్టింది తన బిడ్డకేనని తెలుసుకొని తండ్రి షాక్‌ తిన్నాడు! నిస్సహాయ స్థితిలో ఈ పని చేయాల్సి వచ్చిందని చెబుతూ.. క్షమించమని కోరాడు. మరోవైపు.. ఆ యువకుడు వెంటనే అక్కడి నుంచి పారిపోయి జరిగిన విషయాన్ని కుటుంబ సభ్యులకు, పోలీసులకు చెప్పాడు. తానే ఈ నేరానికి పాల్పడినట్లు పోలీసుల విచారణలో అంగీకరించిన తండ్రి.. ఏటీఎం వద్ద ఉన్నది తన కుమారుడన్న విషయం తెలియలేదన్నాడు. ఈ కేసులో అతనికి 26 నెలల జైలు శిక్ష పడినట్లు అధికారులు వెల్లడించారు.