టొరెంటోలో భారతీయ విద్యార్థి మృతి.. విదేశాంగ మంత్రి సంతాపం

దిల్లీ:  కెనడాలోని టొరెంటోలో జరిగిన కాల్పుల్లో 21 ఏళ్ల భారతీయ విద్యార్థి గాయపడి, మరణించాడు. ఈ ఘటనపై విదేశాంగ మంత్రి ఎస్‌.జైశంకర్‌ సంతాపం వ్యక్తంచేశారు. స్థానిక పోలీసుల కథనం ప్రకారం... ఏప్రిల్‌ 7 సాయంత్రం టొరెంటో సమీపంలోని సబ్‌వే స్టేషన్‌లో కాల్పులు జరిగాయి. భారతీయ విద్యార్థి కార్తీక్‌ వాసుదేవ్‌ (21) సబ్‌వే వద్ద ఉండగా కొందరు నిందితులు కాల్పులు జరిపారు. అక్కడికి చేరుకున్న పోలీసులు క్షతగాత్రుడిని వెంటనే సమీప ఆస్పత్రికి తరలించారు. చికిత్స పొందుతూ విద్యార్థి మరణించాడు.  ఈ ఘటన పట్ల జైశంకర్‌ ట్విటర్‌ వేదికగా దిగ్భ్రాంతిని వ్యక్తం చేశారు. మృతదేహాన్ని స్వదేశానికి తీసుకొచ్చే ప్రయత్నం చేస్తున్నామని పేర్కొన్నారు. కాల్పుల సమయంలో అక్కడ ఉన్న ప్రత్యక్ష సాక్షులు, కెమెరా ఫుటేజ్‌ల సహకారంతో నిందితులను వెతుకుతున్నట్లు పోలీసులు తెలిపారు. ఇటీవలే తన కుమారుడితో ఫోన్‌లో మాట్లాడినట్టు మృతుడి తండ్రి తెలిపారు. తన భద్రతపై ఎలాంటి ఆందోళనా వద్లుదని, కెనడా సురక్షితమని కార్తీక్‌ తెలిపినట్టు ఆయన తండ్రి ఆవేదన వ్యక్తం చేశారు.