Terror Attack: కశ్మీర్‌లో చెలరేగిన ఉగ్రవాదులు.. దాడుల్లో భాజపా సర్పంచి మృతి

శ్రీనగర్‌: కశ్మీర్‌లో మరోసారి ఉగ్రవాదులు చెలరేగారు. అనంత్‌నాగ్‌లో సోమవారం జరిపిన కాల్పుల్లో భాజపా కిసాన్‌ మోర్చా కుల్గాం జిల్లా అధ్యక్షుడు గులాం రసూల్‌దర్‌, ఆయన భార్య మరణించారు. స్వాతంత్ర్య దినోత్సవం సమీపిస్తున్న క్రమంలో స్థానికంగా ఉగ్ర కార్యకలాపాలను కట్టడి చేసినట్లు పోలీసులు పేర్కొన్న గంటల వ్యవధిలోనే ఈ దాడి జరగడం గమనార్హం. మరోవైపు పార్టీ.. ఈ ఘటనను తీవ్రంగా ఖండించింది. అనాగరిక చర్యగా పేర్కొంది. కుల్గాంలోని రెడ్‌వానికి చెందిన గులాం. .  స్థానికంగా ఓ గ్రామానికి సర్పంచిగా వ్యవహరిస్తున్నారు. గతేడాది జిల్లా అభివృద్ధి మండలి ఎన్నికల్లోనూ పోటీ చేశారు. జూన్‌లోనూ పుల్వామాలో భాజపా నేత, మున్సిపల్‌ కౌన్సిలర్ రాకేశ్ పండితను ఉగ్రవాదులు కాల్చి చంపిన విషయం తెలిసిందే.