Andhra News: అనంతబాబును ప్రధాన నిందితుడిగా భావిస్తున్నాం: ఎస్పీ

కాకినాడ: సంచలనంగా మారిన ఏపీ ఎమ్మెల్సీ అనంతబాబు మాజీ డ్రైవర్‌ సుబ్రహ్మణ్యం హత్య కేసులో ఎట్టకేలకు జిల్లా ఎస్పీ రవీంద్రనాథ్‌ బాబు స్పందించారు. ఈ కేసులో అనంతబాబును ప్రధాన నిందితుడిగా భావిస్తున్నట్లు ఎస్పీ తెలిపారు. అనుమానాస్పద కేసు నుంచి హత్య కేసుగా మారుస్తున్నట్లు ఎస్పీ పేర్కొన్నారు. ఈ మేరకు ఆయన విలేకరుల సమావేశంలో మాట్లాడారు. ఎమ్మెల్సీ అనంతబాబుపై అనుమానం ఉందని కుటుంబసభ్యులు అంటున్నట్లు ఎస్పీ పేర్కొన్నారు. అయితే అవగాహన లోపంతో బంధువులు శవపరీక్షకు సహకరించడం లేదన్నారు. శవపరీక్ష చేశాక మృతికి అసలు కారణం తెలుస్తుందన్నారు. కేసు విచారణ నిష్పక్షపాతంగా జరగాలని డీజీపీ ఆదేశించినట్లు ఎస్పీ పేర్కొన్నారు. సుబ్రహ్మణ్యం మృతి కేసులో అనేకమందిని ప్రశ్నిస్తామన్నారు. అనంతబాబుపై సెక్షన్‌ 302, అట్రాసిటీ కేసులు నమోదు చేసినట్లు చెప్పారు. అనంతబాబును వెంటనే అరెస్ట్‌ చేస్తామని ఎస్పీ రవీంద్రనాథ్‌ బాబు తెలిపారు. ఎమ్మెల్సీ కోసం పోలీసు బృందాలు గాలిస్తున్నట్లు  పేర్కొన్నారు. ఈ ఘటనపై ప్రభుత్వం ఆగ్రహంగా ఉన్నట్లు తెలిపారు. ఎమ్మెల్సీని అరెస్టు చేయడంతో పాటు బాధితుడి కుటుంబానికి న్యాయం చేయాలని ప్రజా సంఘాలు నిరసన చేపట్టిన సంగతి తెలిసిందే.