Crime news: నన్నే పెళ్లి చేసుకోనంటావా? ముక్కలుగా కోసి చంపుతా!

కాన్పూర్‌: తనతో పెళ్లికి నిరాకరించిన మైనర్‌ బాలిక(17)ను చంపేస్తానంటూ బెదిరింపులకు పాల్పడిన ఓ యువకుడిని పోలీసులు అరెస్టు చేశారు. ఈ ఘటన ఉత్తర్‌ప్రదేశ్‌లోని కాన్పూర్‌లో చోటుచేసుకుంది. ఈ ఘటనపై పోలీసులు వెల్లడించిన వివరాల ప్రకారం.. మహ్మద్‌ ఫయాజ్‌ అనే యువకుడు పదేపదే ఓ బాలిక వెంటపడుతుండేవాడు. తనను పెళ్లి చేసుకోవాలంటూ బలవంతపెట్టాడు. అయితే, అతడి ప్రతిపాదనను బాలిక నిరాకరించింది. దీంతో తీవ్ర ఆగ్రహానికి గురైన యువకుడు బెదిరింపులకు పాల్పడ్డాడు. ‘పెళ్లి చేసుకోకపోతే.. నిన్ను ముక్కలుగా కోసి చంపుతా’ అని బెదిరించాడని బాలిక కుటుంబ సభ్యులు ఫిర్యాదులో పేర్కొన్నారు. రోజూ స్కూల్‌కు వెళ్లే బాలికను ఫయాజ్‌ అనుసరిస్తూ పదే పదే వేధించేవాడని  బాలిక కుటుంబ సభ్యులు పోలీసులకు తెలిపారు. అతడికి కౌన్సిలింగ్‌ ఇచ్చేందుకు ప్రయత్నించినా బాలికపై వేధింపులు మాత్రం ఆపలేదన్నారు. దీంతో పోలీసులను ఆశ్రయించి ఫిర్యాదు చేసినట్టు పేర్కొన్నారు.

బాలిక కుటుంబ సభ్యులు ఇచ్చిన ఫిర్యాదు మేరకు రంగంలోకి దిగిన పోలీసులు ఫయాజ్‌ ఇంటికి వెళ్లారు. అక్కడికి వెళ్లిన పోలీసులతో నిందితుడి కుటుంబ సభ్యులు వాగ్వాదానికి దిగడంతో అదనంగా పోలీసులను రప్పించి అతడిని అదుపులోకి తీసుకున్నారు. గత నెల 16న ఫిర్యాదు రావడంతో పోక్సో చట్టం కింద కేసు నమోదు చేసిన పోలీసులు అతడిని అరెస్టు చేసి జైలుకు తరలించినట్టు తెలిపారు.