TS News: బైక్‌ లిఫ్ట్‌ అడిగి ఇంజెక్షన్‌తో చంపిన ఘటనలో కీలక పురోగతి.. కారణం ఇదే..!

ఖమ్మం: తెలంగాణలో సంచలనం సృష్టించిన ఇంజెక్షన్‌తో దాడి చేసి వ్యక్తిని చంపిన కేసులో పోలీసులు కీలక పురోగతి సాధించారు. ఖమ్మం జిల్లా ముదిగొండ మండలం వల్లభిలో సోమవారం జరిగిన ఈ ఘటనకు వివాహేతర సంబంధమే కారణమని భావిస్తున్నారు. జమాల్‌ సాహెబ్‌ అనే వ్యక్తి హత్యలో ముగ్గురి ప్రమేయం ఉన్నట్టు గుర్తించిన పోలీసులు నిందితుల కోసం ముమ్మర గాలింపు కొనసాగిస్తున్నారు. ఈ ఘటన తెలుగు రాష్ట్రాల్లో సంచలనం రేపడంతో ప్రత్యేక దృష్టి సారించిన ఖమ్మం నగర పోలీస్‌ కమిషనర్‌ విష్ణు ఎస్‌ వారియర్‌.. ఈ హత్య కేసులో మిస్టరీని ఛేదించేందుకు నాలుగు ప్రత్యేక బృందాలను రంగంలోకి దించారు. అయితే, చింతకాని మండలం మున్నేటికి చెందినవారు ఈ హత్యకు కుట్ర పన్నారని పోలీసులు నిర్ధారణకు వచ్చినట్టు తెలుస్తోంది. జమాల్‌ సాహెబ్‌ను చంపేందుకు నిందితులు పక్కా ప్రణాళిక రచించినట్టు గుర్తించారు. ఈ హత్యలో ఇద్దరు డ్రైవర్లు, ఒక ఆర్‌ఎంపీ వైద్యుడి ప్రమేయం ఉన్నట్టు ప్రాథమికంగా గుర్తించారు. జమాల్‌ భార్య ఫోన్‌ కాల్‌ జాబితాలో నిందితుల ఫోన్‌ నంబర్లు ఉన్నాయని..  వారితోనే ఆమె ఎక్కువసార్లు మాట్లాడినట్టు పోలీసులకు ఆధారాలు లభ్యమైనట్లు తెలుస్తోంది. 

ఈ కేసును ఛేదించేందుకు రంగంలోకి దిగిన పోలీసు బృందాలు.. తొలుత ముదిగొండ, చింతకాని మండలాల్లో తనిఖీలు చేపట్టాయి.  సోమవారం ఎలాంటి ఆధారాలు లభ్యం కాకపోయినప్పటికీ మంగళవారం ఈ కేసు పురోగతికి సంబంధించిన కీలక ఆధారాలను సేకరించారు. గతంలో ఎన్నడూలేని విధంగా బైక్‌పై వెళ్తున్న వ్యక్తిని లిఫ్ట్‌ అడిగి మరీ వెనుకనుంచి ఇంజెక్షన్‌ ఇచ్చి చంపిన ఘటన తెలుగు రాష్ట్రాల్లో సంచలనం సృష్టించడంతో ఈ కేసును ఛేదించడం ప్రతిష్ఠాత్మకంగా తీసుకున్న పోలీసులు 24గంటల్లోనే కీలక ఆధారాలు సేకరించారు. ఎవరు చంపారు? ఎందుకు చంపాల్సి వచ్చింది? ఈ హత్యకు దారితీసిన కారణాలేంటి? ఇదే మార్గాన్ని నిందితులు ఎందుకు ఎంచుకున్నారనే కోణంలో దర్యాప్తు మొదలు పెట్టారు. తొలుత ఘటనా స్థలానికి వెళ్లి.. జమాల్‌ సాహెబ్‌కు మంచినీళ్లు ఇచ్చిన యువకులను విచారించారు. ఆ తర్వాత స్థానిక గ్రామాలతో పాటు రహదారులపై ఉన్న పలు సీసీటీవీ ఫుటేజీలను పరిశీలించినా ఎలాంటి ఆధారాలు లభ్యం కాలేదు.

దీంతో జమాల్‌ సాహెబ్‌ కుటుంబ సభ్యులకు ఈ హత్యలో ఏమైనా ప్రమేయం ఉందా? అనే కోణంలో దృష్టిసారించిన పోలీసులు.. మృతుడి కుటుంబ సభ్యుల ఫోన్‌కాల్‌ డేటాను సేకరించారు. అందులో కొందరు వ్యక్తులతో ఆయన భార్య సంభాషించినట్టు పక్కా వివరాలు సేకరించి ఈ కేసును ఛేదించేందుకు ప్రయత్నించారు. హత్యకు కుట్ర పన్నిన ముగ్గురు వ్యక్తులు.. జమాల్‌ సాహెబ్‌ ఎక్కడికి వెళ్తున్నారో తెలుసుకొని లిఫ్ట్‌ అడిగి చంపినట్టు సమాచారం. పోలీసులు ఇంకా అధికారికంగా ప్రకటించకపోయినప్పటికీ చింతకాని మండలానికి చెందిన ముగ్గురు వ్యక్తులకు ఈ హత్య కేసులో ప్రమేయం ఉందని గుర్తించారు. వారిలో ఇద్దరిని అదుపులోకి తీసుకున్నట్టు సమాచారం. ఈ హత్యకు ప్రధానంగా వివాహేతర సంబంధమే కారణమని ప్రాథమికంగా అనుమానిస్తున్న పోలీసులు ఆ కోణంలోనే దర్యాప్తు కొనసాగిస్తున్నారు. ఈ హత్య కేసుకు సంబంధించిన పూర్తి వివరాలతో పాటు ఇంజెక్షన్‌తోనే దాడి చేయడానికి కారణాలేంటి? అందులో వాడిన రసాయనం ఏంటి? తదితర వివరాలను పోలీసు ఉన్నతాధికారులు బుధవారం మీడియాకు వెల్లడించే అవకాశం ఉంది.