Andhra news: వీటీపీఎస్‌లో తెగిన లిఫ్ట్‌ వైరు.. ఇద్దరు మృతి

విజయవాడ: ఎన్టీఆర్‌ జిల్లా ఇబ్రహీంపట్నంలోని వీటీపీఎస్‌లో ఘోర ప్రమాదం చోటుచేసుకుంది. విజయవాడ థర్మల్‌ పవర్‌స్టేషన్‌లో లిఫ్ట్‌ వైరు తెగడంతో అది అమాంతం కిందకు పడిపోయింది. ఈ ఘటనలో ఇద్దరు కార్మికులు మృత్యువాతపడ్డారు. మరికొంత మంది గాయపడ్డట్లు తెలుస్తోంది. ప్రమాద సమయంలో లిఫ్ట్‌లో ఎనిమిది మంది ఉన్నట్టు సమాచారం. ఈ ఘటనపై సమాచారం అందుకున్న వీటీపీఎస్‌ సిబ్బంది, కార్మికులు హుటాహుటిన ఘటన స్థలానికి చేరుకుని సహాయక చర్యలు చేపట్టారు. క్షతగాత్రులను చికిత్స నిమిత్తం అంబులెన్స్‌లో ఆసుపత్రికి తరలించారు. ఈ మేరకు కేసు నమోదు చేసి దర్యాప్తు చేస్తున్నట్లు పోలీసులు తెలిపారు.

ఎన్టీపీఎస్‌లో ఐదో స్టేజి పనులు కొనసాగుతున్న నేపథ్యంలో మెయింటీనెన్స్‌ కోసం గతంలో ఏర్పాటు చేసిన లిఫ్టులో ఈ రోజు ఉదయం సుమారు 8.45గంటల సమయంలో పరిమితికి మించి కార్మికులు వెళ్లేందుకు ప్రయత్నించారు. అయితే, లిఫ్టు లోడ్‌ ఎక్కువై పనిచేయకపోవడంతో కొందరు దిగి పోగా.. ఇద్దరు మాత్రం అందులోనే ఉండిపోయినట్టు పలువురు పేర్కొంటున్నారు. ఆ సమయంలో మళ్లీ లిఫ్టు పైకి వెళ్లే క్రమంలో వైరు తెగిపోవడంతో ఈ దుర్ఘటన చోటుచేసుకుంది. ఈ ఘటనకు ఎన్టీపీఎస్‌ అధికారుల పర్యవేక్షణ లోపమే కారణమనే విమర్శలు వస్తున్నాయి. ఈ ప్రమాదంలో మృతిచెందిన ఇద్దరు కార్మికుల మృతదేహాలను వీటీపీఎస్‌ బోర్డు ఆస్పత్రికి తరలించారు. గతంలోనూ ఇలాంటి ప్రమాదాలు జరిగినప్పటికీ వీటీపీఎస్‌ యాజమాన్యం నిర్లక్ష్యంగానే వ్యవహరిస్తోందని.. కార్మికుల భద్రతను గాలికొదిలేస్తోందంటూ పలువురు ఆరోపిస్తున్నారు. మృతుల వయస్సు 23-24 ఏళ్ల మధ్యే ఉంటుందని.. వీరంతా ఝర్ఖండ్‌కు చెందిన వారిగా భావిస్తున్నారు.