Crime news: ‘వాట్సాప్‌ స్టేటస్‌’ చూసి యువతి తల్లిని కొట్టి చంపిన వైనం!

ముంబయి: ఓ యువతి వాట్సాప్‌ స్టేటస్‌ ఆమె తల్లికి మృత్యుపాశమైంది. ఆ పోస్టు చూసిన ఓ స్నేహితురాలు.. బంధువులతో కలిసి యువతితోపాటు ఆమె తల్లిపై దాడికి పాల్పడ్డారు. తీవ్రంగా గాయపడ్డ తల్లి ఆసుపత్రిలో ప్రాణాలు విడిచింది. మహారాష్ట్రలోని పాల్ఘార్‌ జిల్లాలో జరిగిన ఈ ఘటన ఆలస్యంగా వెలుగులోకి వచ్చింది.

బోయ్‌సార్‌ పోలీస్‌స్టేషన్‌ పరిధిలో ఓ యువతి (20) తల్లి లీలావతి దేవి (48)తో కలిసి జీవిస్తోంది. సదరు యువతి ఈనెల 10వ తేదీన తన వాట్సాప్‌ స్టేటస్‌లో ఓ మెసేజ్‌ పోస్ట్‌ చేసింది. అయితే ఆ స్టేటస్‌ తన గురించే అని భావించిన ఆమె స్నేహితురాలు.. విషయాన్ని తల్లి, సోదరులకు తెలియజేసింది. నిజానిజాలు తెలుసుకోకుండా కోపంతో ఊగిపోయిన వారంతా అదేరోజు లీలావతి ఇంటికి వెళ్లి గొడవకు దిగారు. తల్లి, కుమార్తెపై దాడికి తెగబడ్డారు. ఈ దాడిలో తీవ్రంగా గాయపడిన లీలావతి దేవి ఆసుపత్రిలో చికిత్స పొందుతూ మరుసటి రోజు మృతిచెందింది.

ఘటనపై విచారణ చేపట్టిన బోయ్‌సార్‌ పోలీసులు సోమవారం ఈ వివరాలను వెల్లడించారు. ఆ ‘వాట్సాప్‌ స్టేటస్‌’ స్నేహితురాలిని ఉద్దేశించి పోస్టుచేసింది కాదని, అదో సాధారణమైన పోస్టేనని స్పష్టం చేశారు. మృతురాలి కుమార్తె ఫిర్యాదు మేరకు కేసు నమోదు చేసుకొని, నిందితులను అరెస్టు చేసినట్లు తెలిపారు.