Blackmail: మార్ఫింగ్‌ ఫొటోలతో.. మహిళా జడ్జికే బెదిరింపులు..!

జైపుర్‌: ఓ మహిళా న్యాయమూర్తికి సంబంధించిన ఫొటోలను మార్ఫింగ్‌ చేసి (Morphed Photos) ఓ వ్యక్తి బెదిరింపులకు (Blackmail) దిగడం రాజస్థాన్‌లో కలకలం రేపింది. తనకు రూ.20లక్షలు ఇవ్వాలని.. లేదంటే వాటిని బహిర్గతం చేస్తానంటూ బ్లాక్‌మెయిల్‌ చేశాడు. దీంతో అప్రమ్తమైన ఆ మహిళా న్యాయమూర్తి (Woman Judge) పోలీసులకు ఫిర్యాదు చేశారు. కేసు నమోదు చేసిన జైపుర్‌ పోలీసులు నిందితుడిని పట్టుకునేందుకు ప్రయత్నిస్తున్నారు.

మహిళా జడ్జికి సంబంధించిన ఫొటోలను ఆమె సోషల్‌ మీడియా ఖాతా నుంచి ఓ వ్యక్తి డౌన్‌లోడ్‌ చేసి మార్ఫింగ్‌ చేశాడు. అనంతరం కోర్టులోని న్యాయమూర్తి ఛాంబర్‌తోపాటు ఆమె ఇంటికీ వాటిని పంపించాడు. స్టెనోగ్రాఫర్‌ ద్వారా ఓ పార్శిల్‌ను అందుకున్న జడ్జి.. వాటిని చూసి కంగుతిన్నారు. అందులో కొన్ని స్వీట్లు, అసభ్యకరమైన ఫొటోలతో పాటు ఓ బెదిరింపు లేఖ కూడా ఉంది. రూ.20లక్షలతో సిద్ధంగా ఉండాలని.. లేదంటే ఫొటోలను బహిర్గతం చేసి జీవితాన్ని నాశనం చేస్తానంటూ మహిళా న్యాయమూర్తిని హెచ్చరించాడు. జడ్జి చిన్ననాటి స్నేహితుడినని లేఖలో పేర్కొన్న ఆ వ్యక్తి.. ఎప్పుడు, ఎక్కడకు నగదు పంపించాలో త్వరలోనే తెలియజేస్తానని పేర్కొన్నాడు.

మరో 20 రోజుల తర్వాత అటువంటి పార్శిల్‌నే మళ్లీ వచ్చింది. పార్శిల్‌ ఇచ్చిన వ్యక్తి పేరును స్టెనో ప్రశ్నించగా.. ఏమీ మాట్లాడకుండానే అక్కడి నుంచి  పారిపోయాడు. దీంతో ఆ మహిళా న్యాయమూర్తి పోలీసులకు ఫిర్యాదు చేశారు. ఈ ఘటనపై ఎఫ్‌ఐఆర్‌ నమోదు చేసిన పోలీసులు.. కోర్టు ప్రాంగణంలోని సీసీటీవీలను పరిశీలించారు. న్యాయమూర్తి ఛాంబర్‌కు పార్శిల్‌ పట్టుకొచ్చిన వ్యక్తిని గుర్తించారు. అతడి వయసు సుమారు 20ఏళ్ల ఉంటుందని అనుమానిస్తున్నారు. నిందితుడిని పట్టుకునేందుకు ప్రయత్నాలు చేస్తున్నట్లు జైపుర్‌ పోలీసులు వెల్లడించారు.