Karnataka: తండ్రిని హత్యచేసి.. 32 ముక్కలుగా నరికి!

బెంగళూరు: కర్ణాటక(Karnataka)లో దారుణం వెలుగుచూసింది. దిల్లీలో శ్రద్ధా వాకర్‌ ఘటన తరహాలో ఇక్కడి బాగల్‌కోట్(Bagalkot)లో ఓ యువకుడు.. తన తండ్రిని హత్య చేసి, మృతదేహాన్ని 32 ముక్కలుగా నరికాడు. అనంతరం.. వాటిని ఓ బోరు బావిలో పారేశాడు. పోలీసుల వివరాల ప్రకారం.. స్థానికంగా విఠల(20) అనే యువకుడు తన తండ్రి పరశురామ్‌(53)తో కలిసి ఉండేవాడు. అతడి తల్లి, సోదరుడు వేరుగా నివాసం ఉంటున్నారు. అయితే.. పరశురామ్‌ రోజూ మద్యం తాగి వచ్చి.. విఠలను దుర్భాషలాడేవాడు.

ఈ క్రమంలోనే డిసెంబరు 6న ఇద్దరి మధ్య వాగ్వాదం జరిగింది. వేధింపులు తాళలేక కుమారుడు ఆగ్రహంతో ఇనుప రాడ్డుతో తండ్రిపై దాడి చేసి హతమార్చాడు. అనంతరం మృతదేహాన్ని 32 ముక్కలుగా నరికి.. సొంత పొలంలోని బోరు బావిలో పారేశాడు. పరశురామ్‌ అదృశ్యంపై ఫిర్యాదు అందుకున్న పోలీసులు.. ఈ మేరకు దర్యాప్తు చేపట్టగా, అసలు విషయం బయటపడింది. దీంతో పోలీసులు నిందితుడిని అరెస్టు చేశారు. మృతుడి శరీర భాగాలను జేసీబీ సాయంతో వెలికితీశారు.