Uttar Pradesh: యూపీలో ఘోరం.. మృతదేహాన్ని 10 కిలోమీటర్లు ఈడ్చుకెళ్లిన కారు!

లఖ్‌నవూ: దిల్లీ(Delhi)లో కొంతకాలం క్రితం ఓ యువతిని కారు దాదాపు 20 కి.మీ. లాక్కెళ్లిన ఘటన సంచలనం సృష్టించిన విషయం తెలిసిందే. తాజాగా ఉత్తర్‌ప్రదేశ్‌(Uttar Pradesh)లోనూ ఈ తరహా దారుణం చోటుచేసుకుంది. కారు కింద చిక్కుకుపోయిన మృతదేహాన్ని ఓ వ్యక్తి 10 కిలోమీటర్లకుపైగా ఈడ్చుకెళ్లాడు. మథుర(Mathura)లో యుమునా ఎక్స్‌ప్రెస్‌ వే(Yamuna Expressway)పై మంగళవారం ఈ ఘటన చోటుచేసుకుంది. ఈ కేసులో వాహనం నడుపుతున్న దిల్లీ వాసి వీరేంద్ర సింగ్‌ను పోలీసులు అరెస్టు చేశారు. అయితే, కారు కింద ఉన్న వ్యక్తి వేరే ప్రమాదంలో చనిపోయాడని.. కానీ, తన వాహనం కింద చిక్కుకున్నాడని నిందితుడు పేర్కొన్నాడు.

వీరేంద్ర సింగ్‌ మంగళవారం తెల్లవారుజామున 4 గంటలకు యమునా ఎక్స్‌ప్రెస్‌వేపై ఆగ్రా నుంచి నోయిడాకు వెళ్తుండగా.. మథుర సమీపంలోని టోల్ గేట్‌ వద్ద అతని కారు కింద ఓ వ్యక్తి మృతదేహం ఇరుక్కుపోయి ఉన్నట్లు అక్కడి సిబ్బంది గుర్తించారు. అప్పటికే మృతదేహం ఛిద్రమైంది. అయితే, దట్టమైన పొగమంచులో దారి సరిగ్గా కనిపించలేదని, ఈ క్రమంలోనే వేరే ఇతర ప్రమాదానికి గురైన వ్యక్తి తన కారు కింద చిక్కుకుపోయినట్లు అతను పోలీసులకు తెలిపాడు. మృతదేహం ఉన్నట్లు గుర్తించలేదని చెప్పాడు. ఈ క్రమంలోనే అతన్ని అరెస్టు చేసిన పోలీసులు పూర్తిస్థాయిలో దర్యాప్తు చేపడుతున్నారు. మృతుడు ఎవరు? ఎలా చనిపోయాడనేది గుర్తించేందుకు సీసీ కెమెరాల ఫుటేజీలను తనిఖీ చేస్తున్నారు. సమీప గ్రామవాసులను విచారిస్తున్నారు.

ఇదిలా ఉండగా.. నూతన సంవత్సరం వేళ దిల్లీలో జరిగిన ఓ రోడ్డు ప్రమాదం తీవ్ర చర్చనీయాంశమైంది. పార్టీ ముగించుకుని స్కూటీపై తిరిగెళ్తున్న అంజలిని ఓ కారు వేగంగా ఢీకొట్టింది. అక్కడితో ఆగకుండా 20 కిలోమీటర్లు అలాగే ఈడ్చుకెళ్లింది. దీంతో కారు చక్రాల్లో చిక్కుకుని ఆమె శరీరం ఛిద్రమైంది. ఈ ఘటనలో ఇప్పటివరకు పోలీసులు ఆరుగురిని అరెస్టు చేశారు. ఈ సంఘటన తర్వాత దేశవ్యాప్తంగా ఈ తరహా ఘటనలు వెలుగు చూస్తుండటం ఆందోళన కలిగిస్తోంది.