Crime News: డబ్బులు, చాకెట్లు ఆశ చూపి బాలికపై అత్యాచారయత్నం

వికారాబాద్‌: 12ఏళ్ల బాలికపై ఓ ప్రబుద్ధుడు అత్యాచార యత్నానికి ఒడిగట్టిన వికారాబాద్‌ జిల్లా కుల్కచర్ల మండలంలో చోటుచేసుకుంది. ఆదివారం రాత్రి జరిగిన ఈ ఘటన ఆలస్యంగా వెలుగుచూసింది. పోలీసులు తెలిపిన వివరాల ప్రకారం.. స్థానిక గిరిజన తండాకు చెందిన మోతిలాల్ అనే వ్యక్తి అదే ప్రాంతానికి చెందిన బాలికకు డబ్బులు, చాకెట్లు ఇప్పిస్తానని తన వెంట తీసుకెళ్లాడు. తండ్రి వయసు ఉన్న వ్యక్తిని నమ్మిన బాలిక తన వెంట వెళ్లింది. ఇదే అదనుగా భావించిన మోతిలాల్‌ బాలికపై లైంగిక దాడికి యత్నించాడు. తేరుకున్న బాలిక కేకలు వేయడంతో గమనించిన స్థానికులు అక్కడికి వచ్చేలోగానే ప్రబుద్ధుడు పారిపోయాడు. దీనిపై ఆదివారం రాత్రి బాధిత కుటుంబసభ్యులు పోలీసులకు సమాచారం ఇచ్చారు. ఈ మేరకు కేసు నమోదు చేసుకున్న పోలీసులు ఘటనపై పూర్తిస్థాయిలో విచారణ జరుపుతున్నట్లు తెలిపారు.