Drugs: కెమిస్ట్రీలో పీజీ చేసి డ్రగ్స్‌ తయారీ.. రూ.1400కోట్ల విలువ చేసే మాదకద్రవ్యాలు పట్టివేత

ముంబయి సమీపంలో ఘటన

ముంబయి: దేశ వాణిజ్య రాజధాని ముంబయి సమీపంలో పెద్ద ఎత్తున మాదకద్రవ్యాలు బయటపడటం కలకలం రేపుతోంది. ఆర్గానిక్‌ కెమిస్ట్రీ పట్టభద్రుడైన ఓ వ్యక్తి ఔషధాల తయారీ ముసుగులో పెద్ద ఎత్తున డ్రగ్స్‌ తయారుచేస్తున్నాడు. మహారాష్ట్రలోని పాల్ఘర్‌ జిల్లాలో 700 కిలోలకు పైగా మెఫిడ్రోన్‌ డ్రగ్స్‌ను ముంబయి పోలీసులు స్వాధీనం చేసుకున్నారు. వీటి విలువ రూ.1400కోట్లకు పైనే ఉంటుందని తెలుస్తోంది.

పాల్ఘర్‌ జిల్లా నాలాసొపారా ప్రాంతంలో ఓ ఔషధ తయారీ యూనిట్‌లో భారీ ఎత్తున మాదకద్రవ్యాలు ఉన్నట్లు ముంబయి క్రైం బ్రాంచ్‌ పోలీసులకు విశ్వసనీయ సమాచారం అందించింది. దీంతో యాంటీ నార్కోటిక్స్‌ విభాగం పోలీసులు గురువారం ఆ యూనిట్‌లో ఆకస్మిక తనిఖీలు చేపట్టగా.. అక్కడ నిషేధిత మాదకద్రవ్యాలు తయారుచేస్తున్నట్లు గుర్తించారు. దాదాపు 700కిలోలకు పైగా మెఫిడ్రోన్‌ డ్రగ్స్‌ను పోలీసులు స్వాధీనం చేసుకున్నారు.

ఈ ఘటనలో నాలాసొపారా యూనిట్‌లో ఓ వ్యక్తిని అరెస్టు చేశారు. నిందితుడు ఆర్గానిక్‌ కెమెస్ట్రీలో పోస్ట్‌ గ్రాడ్యుయేషన్‌ చేశాడు. ఆ నైపుణ్యాలతో అతడు డ్రగ్స్‌ తయారుచేస్తున్నాడని పోలీసులు తెలిపారు. నిందితుడి నుంచి సేకరించిన వివరాలతో ముంబయిలో మరో నలుగురిని అరెస్టు చేశారు. ఇటీవల కాలంలో మహారాష్ట్ర పోలీసులు ఛేదించిన అతిపెద్ద డ్రగ్స్‌ గుట్టు ఇదేనని పోలీసులు తెలిపారు.