మట్టిమిద్దె కూలి ముగ్గురి మృతి

గండేడు: ప్రమాదవశాత్తు మట్టి మిద్దె కూలి తల్లితో సహా ఇద్దరు చిన్నారులు మృతి చెందిన ఘటన బుధవారం తెల్లవారుజామున మహబూబ్‌నగర్‌ జిల్లా గండేడు మండల పరిధిలోని పగిడ్యాల గ్రామంలో చోటుచేసుకుంది. స్థానికులు తెలిపిన వివరాల ప్రకారం..  గ్రామానికి చెందిన జొన్నల శరణమ్మం(35), పెద్ద కుమార్తె భవాని(13), చిన్న కుమార్తె వైశాలి(9) ఇంట్లో నిద్రిస్తున్న సమయంలో వర్షం కురిసింది. వర్షానికి మట్టిమిద్దె తడిసి ఒక్కసారిగా కూలిపోయింది. ఈ ప్రమాదంలో ఇంట్లో నిద్రిస్తున్న తల్లితోపాటు ఇద్దరు చిన్నారులు అక్కడికక్కడే మృతి చెందినట్లు పోలీసులు తెలిపారు. సమాచారం తెలుసుకున్న అదనపు కలెక్టర్‌ ఈటా రామారావు, ఎస్పీ రాజేశ్వరి, ఆర్డీవో శ్రీనివాస్‌, తహసీల్దార్‌ జ్యోతి ఘటనాస్థలికి  చేరుకుని పరిశీలించారు. మృతదేహాలను పోస్టుమార్టం నిమిత్తం ప్రభుత్వాసుపత్రికి తరలించారు.