Vande Bharat Rail: మరో ప్రమాదం.. వందే భారత్‌ రైలు ఢీ కొని మహిళ మృతి

ఆనంద్: గాంధీనగర్‌-ముంబయి మధ్య నడుస్తున్న వందేభారత్‌ (Vande Bharat)రైళ్లకు వరుస ప్రమాదాలు ఎదురవుతున్నాయి. తాజాగా గుజరాత్‌లోని ఆనంద్‌ సమీపంలో ఆర్చిబల్ద్‌ పీటర్‌ (54) అనే మహిళ ట్రాక్ దాటుతుండగా ముంబయి వైపు వెళ్తున్న వందేభారత్‌ రైలు ఢీ కొట్టింది. ఈ ఘటనలో ఆమె అక్కడికక్కడే ప్రాణాలు కోల్పోయినట్లు రైల్వే పోలీసులు వెల్లడించారు. సెప్టెంబరు 30న ప్రధాని మోదీ  గాంధీనగర్‌-ముంబయి మధ్య హైస్పీడ్‌ వందేభారత్‌ రైలును ప్రారంభించిన సంగతి తెలిసిందే. కేవలం నెలరోజుల్లోనే  పశువులను ఢీ కొన్న ప్రమాదాలు మూడు చోటు చేసుకున్నాయి. అక్టోబరు 6న వాత్వా-మణినగర్‌ రైల్వేస్టేషన్ల మధ్య నాలుగు దున్నలను వందేభారత్‌ రైలు ఢీ కొట్టింది. ఈ ఘటనలో రైలు ముందుభాగం దెబ్బతింది. ఆ తర్వాతి రోజే ఆనంద్‌ సమీపంలో ఓ ఆవును ఢీ కొట్టింది. మరో ఘటన అతుల్‌ రైల్వేస్టేషన్‌ సమీపంలో చోటుచేసుకుంది.