Kurnool: కోట్ల సూర్యప్రకాశ్‌రెడ్డి ప్రధాన అనుచరుడు సిద్ధప్ప దారుణ హత్య

కోడుమూరు: కర్నూలు జిల్లా కోడుమూరులో ఫ్యాక్షన్‌ పడగ విప్పింది. కేంద్ర మాజీ మంత్రి, తెదేపా నేత కోట్ల సూర్యప్రకాశ్‌రెడ్డి ప్రధాన అనుచరుడు సిద్ధప్ప దారుణహత్యకు గురయ్యారు. గోనెగండ్ల మండలం కున్నూరుకు చెందిన ఆయన.. కోడుమూరులో తన అనుచరులతో ఉండగా ప్రత్యర్థులు వేటకొడవళ్లతో దాడి చేశారు. పక్కా ప్రణాళిక ప్రకారమే సిద్ధప్పపై దాడి జరిగినట్లు తెలుస్తోంది. 

2008లో దారుణహత్యకు గురైన తెదేపా నేత కప్పట్రాళ్ల వెంకటప్పనాయుడు కేసుతో పాటు కున్నూరు గ్రామంలో జరిగిన మూడు హత్యల్లో సిద్ధప్ప నిందితుడిగా ఉన్నారు. గత కొంతకాలంగా ఆయన కున్నూరు గ్రామాన్ని విడిచి కోడుమూరులో తలదాచుకుంటున్నారు. పాతకక్షల నేపథ్యంలోనే ఈ హత్య జరిగి ఉంటుందని పోలీసులు అనుమానిస్తున్నారు. స్థానిక పోలీసులు కేసు నమోదు చేసుకొని మృతదేహాన్ని శవపరీక్ష నిమిత్తం కోడుమూరు ఆరోగ్య కేంద్రానికి తరలించారు.