Nagpur Terror Plot: నాగ్​పుర్​ రెక్కీ కేసులో నలుగురు ఉగ్రవాదుల అరెస్ట్​

నాగ్‌పుర్‌: మహారాష్ట్ర నాగ్​పుర్​లోని రాష్ట్రీయ స్వయం సేవక్​ సంఘ్​ (ఆర్‌ఎస్‌ఎస్‌) ప్రధాన కార్యాలయం రెక్కీ కేసులో పోలీసులు కీలక పురోగతిని సాధించారు. ఈ కేసుతో సంబంధం ఉన్న నలుగురు ఉగ్రవాదులను సీఆర్‌పీఎఫ్‌, జమ్మూకశ్మీర్‌ పోలీసులు అరెస్ట్​ చేశారు. వారి నుంచి భారీగా ఆయుధాలు, మందుగుండు సామగ్రిని స్వాధీనం చేసుకున్నట్లు పేర్కొన్నారు. పాకిస్థాన్​ ప్రేరేపిత ఉగ్రవాద సంస్థ  జైషే మహ్మద్​కు చెందిన ఓ వ్యక్తి ఇటీవల ఆర్‌ఎస్‌ఎస్‌ ప్రధాన కార్యాలయం వద్ద రెక్కీ నిర్వహించినట్లు నాగ్​పుర్​ పోలీసులకు సమాచారం అందింది. ఈ నేపథ్యంలో నగరంలో హై అలర్ట్ ప్రకటించారు. తాజాగా ఈ కేసుకు సంబంధించి జమ్ముకశ్మీర్​కు చెందిన నలుగురు ముష్కరులను అదుపులోకి తీసుకున్నారు.

ఆర్​ఎస్​ఎస్​ కార్యాలయంతో పాటు నగరంలోని పలు కీలక ప్రాంతాల్లో ఉగ్రవాదులు రెక్కీ నిర్వహించినట్లు పోలీస్ కమిషనర్ అమితేష్ కుమార్ తెలిపారు. కేంద్ర దర్యాప్తు సంస్థలు జమ్ముకశ్మీర్​కు చెందిన ఓ యువకుడిని అరెస్ట్​ చేయగా.. నాగ్​పుర్​లో రెక్కీ విషయం తెలిసిందని వివరించారు. సదరు వ్యక్తి ఇచ్చిన సమాచారం ఆధారంగా సీఆర్​పీఎఫ్​, జమ్ముకశ్మీర్​ పోలీసులు మరో నలుగురు ఉగ్రవాదులను అరెస్ట్​ చేశారని పేర్కొన్నారు. నిందితులపై చట్ట వ్యతిరేక కార్యకలాపాల నిరోధ చట్టం (ఉపా) కింద కేసు నమోదు చేసినట్లు అమితేశ్​​ కుమార్​ వెల్లడించారు.