Crime news: జీన్స్‌ ధరించేందుకు నిరాకరించాడని భర్తను చంపేసింది!

రాంచీ: పెళ్లి తర్వాత జీన్స్‌ ధరించడానికి ఒప్పుకోలేదని భర్తను ఓ మహిళ కత్తితో పొడిచి చంపేసింది. ఈ ఉదంతం జార్ఖండ్‌లోని జామ్తారా పోలీస్‌ స్టేషన్‌ పరిధిలోని జోర్భితా గ్రామంలో వెలుగు చూసింది. పుష్పా హెంబ్రోమ్‌ అనే మహిళ శనివారం రాత్రి జీన్స్ ప్యాంటు ధరించి గోపాల్‌పూర్ గ్రామంలో జరిగే జాతర చూసేందుకు వెళ్లింది. అయితే, ఇంటికి తిరిగి వచ్చిన తర్వాత ఆమె వస్త్రధారణపై దంపతుల మధ్య తీవ్ర వాగ్వాదం చోటుచేసుకుంది.  పెళ్లి తర్వాత జీన్స్‌ ఎందుకు ధరించావని భర్త ప్రశ్నించడంతో చెలరేగిన ఘర్షణ ఇద్దరి మధ్య తీవ్రస్థాయిలో మాటా మాటా పెరిగే దాకా వెళ్లింది. దీంతో ఆవేశానికి గురైన పుష్ప.. భర్తపై కత్తితో దాడి చేసి తీవ్రంగా గాయపరిచింది. కుటుంబ సభ్యులు వెంటనే అతన్ని ధన్‌బాద్‌లోని ఆస్పత్రికి తరలించగా చికిత్స పొందుతూ ప్రాణాలు కోల్పోయాడు. తన కుమారుడు, కోడలి మధ్య జీన్స్‌ ధరించే విషయంలో గొడవ జరగడంతో ఆమె కత్తితో పొడిచి చంపినట్టు మృతుడి తండ్రి తెలిపారు. ఈ ఘటనపై కేసు నమోదు చేసుకున్న పోలీసులు దర్యాప్తు చేపట్టారు.