Hyderabad: డేటా చోరీ కేసులో ప్రముఖ సంస్థలకు నోటీసులు

హైదరాబాద్‌: డేటా చోరీ కేసులో పలు కంపెనీలకు సైబరాబాద్‌ పోలీసులు నోటీసులు జారీ చేశారు. బ్యాంకులు, ఫైనాన్స్‌ సంస్థలు, ఐటీ కంపెనీలు, ఓటీటీ, ఈ కామర్స్‌ వెబ్‌సైట్లు, ఈ లెర్నింగ్ సెంటర్లకు నోటీసులు పంపారు. అలాగే బిగ్‌ బాస్కెట్‌, ఫోన్‌ పే, ఫేస్‌ బుక్‌, పాలసీ బజార్‌, యాక్సిస్‌ బ్యాంకు, బ్యాంక్ ఆఫ్‌ బరోడా, హెచ్‌డీఎఫ్‌సీ, ఎస్‌బీఐ, టెక్ మహీంద్రాతో పాటు పలు కంపెనీలకు నోటీసులు పంపించారు. వినియోగదారుల డేటా లీకేజీకి సంబంధించి సదరు కంపెనీల నుంచి వివరణ కోరారు.

20అంశాలతో కూడిన లేఖలు రాయాలని నిర్ణయం

డేటా చోరీ కేసు బయటపడటంతో సైబరాబాద్‌ పోలీసులు తీసుకోవాల్సిన జాగ్రత్తలపై ప్రణాళికలు రూపొందించారు. పలు కంపెనీలకు లేఖలు రాయాలని నిర్ణయించారు. డేటా బయటకు వెళ్లకుండా వ్యక్తిగతంగా ఎలాంటి జాగ్రత్తలు తీసుకోవాలని విషయాలపై అవగాహన కల్పించే విధంగా అంశాలను రూపొందించారు. ఇందులో భాగంగా 20 అంశాలతో కూడిన లేఖలను పలు కంపెనీలకు పంపనున్నారు. కంపెనీల్లో పనిచేసే ఉద్యోగులు, సిబ్బందికి అవగాహన కలిగేలా కార్యక్రమం నిర్వహించాలని యాజమాన్యాలకు సూచించనున్నారు. ఇన్‌ఫర్మేషన్ యాక్టులో నిబంధనలు అమలయ్యేలా సైబరాబాద్‌ పోలీసులు దృష్టి సారించారు. వినియోగదారులు తమ మొబైల్‌ నెంబర్, ఆధార్‌ కార్డు ఇతర విషయాల్లో తీసుకోవాల్సిన జాగ్రత్తలు సూచిస్తున్నారు. ప్లే స్టోర్‌ నుంచి అప్లికేషన్‌ డౌన్‌లోడ్‌ చేసుకునే సందర్భంలో తీసుకోవాల్సిన జాగ్రత్తలపై అవగాహన కల్పిస్తారు. మొబైల్‌ సెట్టింగ్‌లోనూ ఎలాంటి జాగ్రత్తలు తీసుకోవాలనే అంశంలో అవగాహన కార్యక్రమాలు ఏర్పాటు చేస్తారు.