ఆమె యాచకురాలు కాదు.. కోటీశ్వరురాలు!

కైరో: ఈజిప్టులో భిక్షాటన చేస్తోన్న ఓ మహిళను ఇటీవల పోలీసులు అరెస్టు చేశారు. కాళ్లు బాగానే ఉన్నా.. దివ్యాంగురాలిగా నటిస్తూ ప్రజలను మోసం చేస్తోందని ఆమెపై వచ్చిన ఆరోపణ. దీనిపై ఆమెను విచారించిన పోలీసులకు విస్తుపోయే విషయాలు తెలిశాయి. ఆ ఆరోపణ నిజం కావడమే కాదు.. ఆమె రూ.కోట్లకు పడగలెత్తిన యాచకురాలని తెలిసి పోలీసులు ఆశ్చర్యపోయారు.

ఓ అంతర్జాతీయ మీడియా వెల్లడించిన కథనం ప్రకారం.. నఫీసా అనే మధ్యవయస్కురాలైన మహిళ ఈజిప్టులోని పలు ప్రావిన్స్‌లో గత కొన్నాళ్లుగా దివ్యాంగురాలిగా నటిస్తూ వీల్‌ఛైర్‌లో కూర్చొని భిక్షాటన చేస్తోంది. సాయంత్రం కాగానే వీల్‌ఛైర్‌ పక్కన పెట్టేసి, చక్కగా నడుచుకుంటూ వెళ్లిపోయేది. చాలా మంది ఈ విషయాన్ని గమనించారు. ఈ విషయం పోలీసుల వరకు వెళ్లడంతో వారు ఆమెను అరెస్టు చేశారు. పక్షవాతం వల్ల ఒక కాలు కోల్పోయినట్లు ఆమె చెప్పినా.. అది అవాస్తవమని తేలింది. విచారణలో ఈ యాచకురాలికి గర్బియా, ఖలిబుయా గవర్నరేట్స్‌లో ఐదు నివాస భవనాలు ఉన్న విషయం బయటపడింది. అంతేకాదు, ఆమెకు చెందిన రెండు బ్యాంక్‌ ఖాతాల్లో 3 మిలియన్‌ ఈజిప్షియన్‌ పౌండ్స్‌(దాదాపు రూ.1.42కోట్లు) ఉన్నట్లు పోలీసులు గుర్తించారు. కోటీశ్వరురాలైన ఈ యాచకురాలి విషయంలో మరింత దర్యాప్తు జరిపి కోర్టులో హాజరుపరుస్తామని పోలీసులు వెల్లడించారు.