Salman Khan: సల్మాన్‌కు బెదిరింపు మెయిల్‌ కేసులో వైద్య విద్యార్థికి లుక్‌అవుట్‌ నోటీసులు

ఇంటర్నెట్‌ డెస్క్‌: బాలీవుడ్ నటుడు సల్మాన్‌ఖాన్‌(Salman khan)కు ఇటీవల వచ్చిన బెదిరింపుల కేసులో యూకేలోని ఓ వైద్యవిద్యార్థిని నిందితుడిగా గుర్తించారు. అతడికి లుక్‌అవుట్ (LOC) నోటీసులు జారీ చేశారు.  అతడి స్వస్థలం హరియాణా. ఆ విద్యార్థిని ఇండియాకు తీసుకురావడానికి పోలీసులు చర్యలు చేపట్టారు. గ్యాంగ్‌స్టర్‌ గోల్డీ బ్రార్‌ పేరిట అతడు సల్మాన్‌ ఖాన్‌కు బెదిరింపు ఈ మెయిల్‌ పంపినట్టు అనుమానిస్తున్నారు.

గతనెల సల్మాన్‌ఖాన్‌కు ఓ బెదిరింపు ఈ మెయిల్‌ వచ్చింది. అందులో గ్యాంగ్‌స్టర్‌ లారెన్స్‌ బిష్ణోయ్‌ అనుచరుడు గోల్డీ బ్రార్‌తో ముఖాముఖి మాట్లాడి వ్యవహారాన్ని చక్కబెట్టుకోవాలని  లేదంటే తీవ్ర పరిణామాలుంటాయని సల్మాన్‌ను బెదిరించారు. తొలుత ఈ కేసులో రాజస్థాన్‌కు చెందిన ధకడ్‌ రామ్‌ బిష్ణాయ్‌ను నిందితుడిగా గుర్తించిన పోలీసులు అతడిని అరెస్టు చేశారు. ఇటీవల కూడా సల్మాన్‌కు మరోసారి బెదిరింపులు వచ్చాయి. దుండగుడు ఏకంగా ముంబయి పోలీస్ కంట్రోల్‌ రూమ్‌కు ఫోన్‌ చేసి సల్మాన్‌ను చంపేస్తామని బెదిరించాడు. ఈ కేసులో 16 ఏళ్ల కుర్రాడిని నిందితుడిగా గుర్తించి అదుపులోకి తీసుకున్నారు.