Hyderabad: టీచర్‌, రాజేశ్‌ చనిపోవాలనుకున్నారు?.. పోలీసుల చేతికి కీలక ఆధారాలు

హైదరాబాద్‌: హయత్‌నగర్‌లో ఆత్మహత్యకు పాల్పడిన రాజేశ్‌, టీచర్‌ సుజాత కేసు దర్యాప్తులో సంచలన విషయాలు వెలుగు చూశాయి. వారిద్దరి మధ్య ఏం జరిగింది? ఎందుకు చనిపోవాలనుకున్నారు?ఆత్మహత్యకు దారితీసిన పరిస్థితులపై పోలీసులు స్పష్టమైన ఆధారాలు సేకరించారు. దర్యాప్తు కొలిక్కి రావడంతో ఇద్దరూ ఆత్మహత్య చేసుకున్నట్టు పోలీసులు నిర్ధరించారు.

ఏడాదిన్నర క్రితం రాజేశ్‌ ఇచ్చిన మిస్డ్‌ కాల్‌తో టీచర్‌ పరిచయమయ్యారు. ఈ క్రమంలో ఆమె తన వ్యక్తిగత ఫొటోలను రాజేశ్‌కు పంపించారు. ఆమెపై రాజేశ్‌ అమితంగా ప్రేమ పెంచుకున్నాడు. ఆమె కోసం ఇంటి చుట్టూ ప్రతిరోజు తిరిగేవాడు. రాజేశ్‌ ప్రవర్తనతో టీచర్‌ ఒత్తిడికి లోనైంది. ఇద్దరి వ్యవహారం అక్రమ సంబంధానికి దారి తీసింది. ఈనెల 24న వారిద్దరూ చివరిసారి కలుసుకొని పురుగుల మందు తాగి చనిపోవాలని నిర్ణయించుకున్నారు. టీచర్‌ పేరు మీద హయత్‌నగర్‌లోని ఒక దుకాణంలో రాజేశ్‌ పురుగుల మందు కొనుగోలు చేశాడు. ఈనెల 24న ఇంటికెళ్లిన తర్వాత ఆమె పురుగుల మందు తాగారు. రాజేశ్‌ కూడా అదే రోజు పురుగుల మందు తాగాడు. టీచర్‌ను ఆమె భర్త నాగేశ్వరరావు ఆసుపత్రిలో చేర్చగా.. చికిత్స పొందుతూ ఈనెల 29న మృతి చెందారు. వారిద్దరి ఫోన్లలో ఉన్న పూర్తి వివరాలతో పోలీసులు కేసును ఛేదించారు. సీసీ కెమెరాల ఆధారంగానూ పోలీసులు ఆధారాలు సేకరించారు.