Andhra News: అర్ధరాత్రి తలుపుకొట్టి.. మహిళపై అత్యాచారం!

విజయనగరం: ఏపీలోని విజయనగరం జిల్లా ఉడా కాలనీలో దారుణం జరిగింది. ఇద్దరు పిల్లలతో ఉంటున్న మహిళపై ఓ దుండగుడు అత్యాచారానికి పాల్పడ్డాడు. బాధిత మహిళ ఉపాధి కోసం పార్వతీపురం మన్యం జిల్లా నుంచి విజయనగరం వచ్చింది. అక్కడే టీ దుకాణంలో పనిచేస్తోంది. సోమవారం అర్ధరాత్రి ఆమె ఇంటి తలుపుకొట్టిన దుండగుడు.. తలుపు తీయగానే బలవంతంగా లోనికి చొరబడి ఈ అఘాయిత్యానికి పాల్పడినట్లు తెలుస్తోంది. బాధిత మహిళ ఫిర్యాదు మేరకు విజయనగరం పోలీసులు కేసు నమోదు చేసుకొని దర్యాప్తు చేస్తున్నారు. 

విచారణ తర్వాత పూర్తి వివరాలు వెల్లడిస్తాం: ఎస్పీ

మహిళపై అత్యాచారం కేసులో నిందితుడిని అదుపులోకి తీసుకున్నట్లు విజయనగరం జిల్లా ఎస్పీ దీపికా పాటిల్‌ తెలిపారు. ఉడా కాలనీలోని మహిళపై యువకుడు అత్యాచారానికి పాల్పడినట్లు ఆమె వెల్లడించారు. విజయనగరంలో మీడియాతో ఎస్పీ మాట్లాడారు. బాధితురాలు తన స్నేహితునితో ఇంట్లో ఉండగా.. అక్కడికి ఇద్దరు యువకులు వచ్చారన్నారు. వారిలో ఒకరు మహిళపై అత్యాచారానికి ఒడిగట్టారని తెలిపారు. నిందితుడిని విజయనగరానికి చెందిన వ్యక్తిగా గుర్తించామని తెలిపారు. బాధితురాలి ఫిర్యాదు మేరకు ఈ ఘటనలో ప్రమేయం ఉన్న వారందరిపైనా కేసు నమోదు చేస్తున్నట్లు ఎస్పీ దీపిక చెప్పారు. విచారణ తర్వాత పూర్తి వివరాలు వెల్లడిస్తామన్నారు.