Road Accident: స్కూల్‌ బస్సును ఢీకొట్టిన ఆర్టీసీ బస్సు.. 30 మందికి గాయాలు

ఎల్లాపెడ్డిపేట: రాజన్న సిరిసిల్ల జిల్లా ఎల్లారెడ్డిపేట మండల కేంద్రంలో రోడ్డు ప్రమాదం జరిగింది. ఓ ప్రైవేటు పాఠశాల బస్సును ఆర్టీసీ బస్సు ఢీకొట్టింది. ఈ ప్రమాదంలో మొత్తం 30 మందికి గాయాలయ్యాయి. పాఠశాల బస్సులోని 20 మంది విద్యార్థులు, ఆర్టీసీ బస్సులోని 10 మంది ప్రయాణికులు గాయపడ్డారు. గాయపడిన విద్యార్థులను ఎల్లారెడ్డిపేటలోని ఓ ప్రైవేటు ఆస్పత్రికి తరలించి చికిత్స అందిస్తున్నారు. బస్సులోని క్షతగాత్రులకు సిరిసిల్ల జిల్లా ఆస్పత్రిలో చేర్పించారు. 

కామారెడ్డి నుంచి సిరిసిల్ల వైపునకు వెళ్తున్న ఆర్టీసీ బస్సు.. పాఠశాల బస్సును వెనుక నుంచి ఢీకొట్టడంతో ఈ ప్రమాదం జరిగింది. ఘటన జరిగిన తర్వాత పాఠశాల విద్యార్థులు రక్తమోడిన గాయాలతో తల్లడిల్లిపోయారు. ఓ విద్యార్థి తన తోటి విద్యార్థికి అయిన గాయాలను చూపుతూ చేసిన రోదన అక్కడున్న వారిని కలచివేసింది. 

మరోవైపు ఈ ఘటనపై మంత్రి కేటీఆర్‌ స్పందించారు. జిల్లా కలెక్టర్‌తో ఆయన ఫోన్‌లో మాట్లాడి ప్రమాదం వివరాలను తెలుసుకున్నారు. గాయపడిన విద్యార్థులకు మెరుగైన వైద్యం అందేలా చూడాలని కేటీఆర్‌ ఆదేశించారు.