Road Accident: కారు-డీసీఎం వాహనం ఢీ: నలుగురి దుర్మరణం

మహేశ్వరం: హైదరాబాద్‌- శ్రీశైలం తుమ్మలూరు గేట్‌ సమీపంలో ఘోర రోడ్డు ప్రమాదం జరిగింది. ఓ కారును డీసీఎం వాహనం ఢీకొట్టడంతో నలుగురు మృతిచెందారు. మృతులను నాగర్‌కర్నూలు జిల్లా వెల్దండ మండలం పోతేపల్లికి చెందిన బైకని యాదయ్య (35), ముంత శ్రీనివాసులు (35), ఇమ్మరాసి రామస్వామి (36), హనుమంతు కేశవులు (33)గా గుర్తించారు. వీరు వివిధ బృందాలుగా ఏర్పడి శుభకార్యాల్లో వంటలు చేస్తూ ఉపాధి పొందేవారు. ఈ క్రమంలోనే గురువారం రాత్రి హైదరాబాద్‌లోని ఓ శుభకార్యంలో వంటలు చేసి తిరిగొస్తుండగా శుక్రవారం ఉదయం తుమ్మలూరు గేట్‌ సమీపంలోని మ్యాక్‌ ప్రాజెక్టు వద్ద ప్రమాదం చోటుచేసుకుంది. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.