ఫ్రెండ్‌ రిక్వెస్ట్‌ పంపిస్తే ‘అలా’ చేయమని కాదు..!

సిమ్లా: ఫేస్‌బుక్‌లో ఫ్రెండ్‌ రిక్వెస్ట్‌ పంపించినంత మాత్రాన.. అది లైంగిక సంబంధం పెట్టుకోవడానికి, వేధింపులకు గురిచేయడానికి అనుమతి ఇచ్చినట్లు కాదని హిమాచల్‌ ప్రదేశ్‌ హైకోర్టు వ్యాఖ్యానించింది. మైనర్‌ బాలికపై అత్యాచారం కేసులో నిందితుడికి బెయిల్‌పై కోర్టులో తాజాగా విచారణ జరిగింది. బాధితురాలే ఫేస్‌బుక్‌లో ఫ్రెండ్‌ రిక్వెస్ట్‌ పంపిందని, బాలిక తన వయసు గురించి తప్పుడు సమాచారం ఇచ్చిందని నిందితుడి తరఫు న్యాయవాది కోర్టుకు వాదనలు వినిపించాడు. దీనిపై స్పందించిన న్యాయమూర్తి .. ‘‘నెటిజన్లు సోషల్‌మీడియాలో తమ గుర్తింపును గోప్యంగా ఉంచడం సహజమే. ఫ్రెండ్‌ రిక్వెస్ట్‌ అనేది నిందితుడు ఆమెతో లైంగిక సంబంధం పెట్టుకోవడానికి అనుమతి కాదు’’అని వ్యాఖ్యానించారు. నిందితుడికి బెయిల్‌ ఇచ్చేందుకు నిరాకరించారు. సోషల్ ‌మీడియా వినియోగించడమనేది ఒక సంప్రదాయంగా మారిపోయిందని.. ఇది పరిధిని పెంచుకోవడానికి, జ్ఞానం, వినోదం పొందడానికే గానీ.. మానసిక, లైంగిక వేధింపులకు గురిచేయడానికి కాదని న్యాయమూర్తి హితవు పలికారు.

ఇదీ చదవండి..

సైబర్‌ మోసాలకు పాల్పడుతున్న ముఠా అరెస్టు!