Crime news: ‘మహా’లో మరో విషాదం.. అత్యాచార అవమానం తట్టుకోలేక బాలిక ఆత్మహత్య

ముంబయి: మానవ మృగాల పైశాచికత్వానికి ఓ మహిళ బలైన కొద్ది గంటలకే మహారాష్ట్రలో మరో విషాదం చోటుచేసుకుంది. అత్యాచార అవమానం తట్టుకోలేక ఓ బాలిక(17) శనివారం తనువు చాలించింది. ఈ ఘటన అమరావతి జిల్లాలోని ఓ గ్రామంలో చోటుచేసుకుంది. బాలిక కుటుంబానికి బంధువైన ఓ వ్యక్తి (24) తరచూ వారి ఇంటికి వచ్చేవాడు. ఈ క్రమంలోనే అతడు బాలికకు మాయమాటలు చెప్పి లొంగదీసుకున్నాడు. ప్రస్తుతం ఆమె ఏడు నెలల గర్భిణి. విషయం కుటుంబసభ్యులతోపాటు బయట కూడా తెలియడంతో అవమానం భరించలేని ఆ బాలిక ఇంట్లో ఉరేసుకొని ఆత్మహత్యకు పాల్పడింది. మైనర్‌పై అత్యాచారానికి పాల్పడిన వ్యక్తిని పోలీసులు అదుపులోకి తీసుకొని కేసు నమోదు చేశారు.

ముంబయి మహానగరంలో గురువారం అర్ధరాత్రి నిర్భయ తరహా ఘటన చోటుచేసుకుంది. సాకినాక శివారు ప్రాంతంలో ఓ మహిళ(34)పై కొందరు దుర్మార్గులు అత్యంత కిరాతకంగా లైంగిక దాడికి పాల్పడ్డారు. అత్యాచారం చేసి, బాధితురాలి రహస్య అవయవాలపై ఇనుప రాడ్డుతో దాడి చేశారు. అనంతరం నడిరోడ్డుపై వదిలేసి వెళ్లిపోయారు. రక్తపుమడుగులో ఉన్న ఆ మహిళను గమనించిన కొందరు పోలీసులకు సమాచారం అందించారు. పోలీసులు అక్కడకు చేరుకుని ఆమెను ఆసుపత్రికి తరలించారు. తీవ్రంగా గాయపడిన బాధితురాలు చికిత్స పొందుతూ శనివారం ప్రాణాలువిడిచారు.