Crime news: ఆరేళ్ల బాలికపై ఏడాదిగా నలుగురి అత్యాచారం.. అందరూ మైనర్లే!

హోషియార్‌పూర్‌ (పంజాబ్‌): అభం శుభం తెలీని ఆరేళ్ల బాలికపై ఏడాదిగా నలుగురు అత్యాచారానికి పాల్పడ్డారు. ఆలస్యంగా వెలుగుచూసిన ఈ ఘటనలో నిందితులు నలుగురూ మైనర్లే కావడం గమనార్హం. సమాజం సిగ్గుతో తలదించుకోవాల్సిన ఈ ఘటన పంజాబ్‌లో చోటుచేసుకుంది. ఈ కేసులో ముగ్గురిని పోలీసులు అదుపులోకి తీసుకోగా.. మరొకరు పరారీలో ఉన్నారు.

పంజాబ్‌ హోషియార్‌పూర్‌ జిల్లాలోని ఓ గ్రామానికి చెందిన ఆరేళ్ల బాలికపై నలుగురు బాలురు ఏడాదిగా అత్యాచారానాకి పాల్పడ్డారు. ఇటీవల తన తల్లిదండ్రులకు ఆ బాలిక ఈ విషయాన్ని తెలియజేయడంతో ఈ దారుణం వెలుగులోకి వచ్చింది. దీనిపై బాలిక తల్లిదండ్రులు ఇటీవల పోలీస్‌స్టేషన్‌లో ఫిర్యాదు చేశారు. దీంతో పోక్సో చట్టంపై నలుగురిపై పోలీసులు కేసు నమోదు చేశారు. అందులో ముగ్గుర్ని అదుపులోకి తీసుకుని జువైనల్‌ హోమ్‌కు తరలించారు. వీరి వయసు 10-11 సంవత్సరాలే! ఏడాది పాటు పలుమార్లు బాలికపై వీరు అత్యాచారానికి పాల్పడినట్లు దర్యాప్తు అధికారి కమలేశ్‌ కుమారి తెలిపారు. 14 ఏళ్ల వయసున్న మరో బాలుడు పరారీలో ఉన్నట్లు చెప్పారు. నిందితుడి కోసం గాలిస్తున్నట్లు తెలిపారు.