Crime News: ఈవ్‌టీజింగ్‌ చేసి.. ఆపై ఆందోళన చెంది..

ఇంట్లో ఉరి వేసుకుని బాలుడి ఆత్మహత్య

పహాడీషరీఫ్‌, న్యూస్‌టుడే: ఓ బాలుడు తరగతి గదిలో తోటి విద్యార్థినులను వేధించాడు. టీచర్లు, తల్లిదండ్రులు మందలించడంతో ఉరి వేసుకుని ఆత్మహత్యకు పాల్పడ్డాడు. పహాడీషరీఫ్‌ ఎస్సై మధు కథనం ప్రకారం... జల్‌పల్లి పురపాలికలోని ఓ కాలనీలో నివసించే బాలుడు(13) రాజేంద్రనగర్‌ సర్కిల్‌లోని ఓ బడిలో తొమ్మిదో తరగతి చదువుతున్నాడు. గురువారం తరగతిగదిలో ఇద్దరు విద్యార్థులతో కబుర్లు చెప్పసాగాడు. విద్యార్థినుల పుస్తకాలు తీసుకుని వారి గురించి అసభ్య పదజాలం రాశాడు. వారు ఫిర్యాదు చేయడంతో టీచర్‌ ముగ్గురు బాలురనూ మందలించారు. ఈ విషయం వారి తల్లిదండ్రులకూ ఫోన్‌లో చెప్పారు. అసభ్యవ్యాఖ్యలు రాసిన బాలుడి తండ్రి అతడిని ఫోన్‌లోనే మందలించారు. బాలుడు సాయంత్రం ఇంటికి వచ్చేసరికి తల్లిదండ్రులు బయటకు వెళ్లారు. ఇంతలో మిలిటరీలో ఉన్న మేనమామ బాలుడితో ఫోన్‌లో మాట్లాడి తల్లిదండ్రులను క్షమాపణలు కోరాలని సూచించారు. ఈ పరిణామాలతో కలత చెందిన బాలుడు ఇంట్లో ఫ్యాన్‌కు చీరతో ఉరి వేసుకుని ప్రాణాలు తీసుకున్నాడు.