Crime News: పోలీసులుగా నటించి.. 17 ఏళ్ల బాలికపై సామూహిక అత్యాచారం!

ముంబయి: పోలీసులుగా నటిస్తూ.. ఇద్దరు వ్యక్తులు ఓ బాలికపై సామూహిక అత్యాచారానికి పాల్పడ్డ ఘటన ఇది. మహారాష్ట్రలోని ఠాణె(thane) జిల్లాలో వెలుగుచూసింది. పోలీసుల వివరాల ప్రకారం.. ఓ 17 ఏళ్ల బాలిక తన ప్రియుడితో కలిసి కళ్యాణ్‌లోని డోంబివలీ(Dombivli) ప్రాంతానికి షికారుకు వచ్చారు. ఈ క్రమంలోనే ఇద్దరు వ్యక్తులు వారి వద్దకు చేరుకుని, తమను తాము పోలీసులుగా నమ్మించారు. ఈ ప్రాంతంలో తిరగొద్దంటూ హెచ్చరించారు.

ఈ క్రమంలోనే యువకుడిపై దాడి చేసి, ఆమెను బలవంతంగా సమీపంలోని అటవీ ప్రాంతంలోకి తీసుకెళ్లి సామూహిక అత్యాచారానికి పాల్పడ్డారు. ఇదంతా వీడియో తీసి, ఎవరికైనా చెబితే దీన్ని వైరల్‌ చేస్తామని బెదిరించారు. అనంతరం బాధితురాలు పోలీసులను ఆశ్రయించారు. దీంతో పోలీసులు నిందితులపై పోక్సో చట్టంతోసహా ఇతర సెక్షన్ల కింద కేసు నమోదు చేశారు. పరారీలో ఉన్న నిందితులకోసం గాలింపు ముమ్మరం చేశారు.