Teenmar Mallanna: కానిస్టేబుళ్లపై దాడి కేసు.. చర్లపల్లి జైలుకు తీన్మార్‌ మల్లన్న

హైదరాబాద్‌: విధి నిర్వహణలో ఉన్న పోలీసులను అపహరించి, దాడికి పాల్పడ్డారని తీన్మార్‌ మల్లన్నతో పాటు క్యూ న్యూస్‌ కార్యాలయంలో పనిచేసే నలుగురిని పోలీసులు అరెస్టు చేశారు. ఐదుగురు నిందితులను హయత్‌నగర్‌ కోర్టులో హాజరుపర్చగా.. కోర్టు ఆదేశాల మేరకు చర్లపల్లి జైలుకు రిమాండ్‌కు తరలించారు. ఎఫ్‌ఐఆర్‌లో పేర్కొన్న వివరాల ప్రకారం.. మంగళవారం సాయంత్రం 5గంటల సమయంలో ఫీర్జాదిగూడలోని రాఘవేంద్ర హోటల్‌ సమీపంలో ఇద్దరు కానిస్టేబుళ్లు మఫ్టీలో విధులు నిర్వహించారు. 

గొలుసు దొంగతనాలు నివారించడానికి తనిఖీలు నిర్వహిస్తున్న ఇద్దరు కానిస్టేబుళ్ల దగ్గరికి ముగ్గురు వ్యక్తులు వచ్చి వాదనకు దిగారు. ఇద్దరు కానిస్టేబుళ్లను సమీపంలో ఉన్న క్యూ న్యూస్‌ కార్యాలయంలోకి లాక్కెళ్లారు. క్యూ న్యూస్‌ కార్యాలయం చుట్టూ సంచరిస్తున్నారంటూ తీన్మార్‌ మల్లన్నతో పాటు, సిబ్బంది దాడికి దిగారు. ఈ దాడిలో ఇద్దరు కానిస్టేబుళ్లకు గాయాలయ్యాయి. విషయం తెలుసుకున్న పోలీసు అధికారులు ఘటనాస్థలికి చేరుకుని ఇద్దరు కానిస్టేబుళ్లను క్యూ న్యూస్‌ కార్యాలయం నుంచి బయటకు తీసుకొచ్చారు. కానిస్టేబుళ్ల ఫిర్యాదు మేరకు కేసు నమోదు చేసి ఐదుగురిని అరెస్టు చేసి రిమాండ్‌కు తరలించారు.