TS News: విద్యార్థినులను వేధించిన కీచక ఉపాధ్యాయుడికి 21 ఏళ్ల జైలు

కొత్తగూడెం గ్రామీణం, న్యూస్‌టుడే: భద్రాద్రి కొత్తగూడెం జిల్లా లక్ష్మీదేవిపల్లి మండలంలో విద్యార్థినులను లైంగికంగా వేధించిన ఉపాధ్యాయుడికి కఠిన శిక్ష విధిస్తూ కొత్తగూడెంలోని పోక్సో ప్రత్యేక ఫాస్ట్‌ట్రాక్‌ కోర్టు న్యాయమూర్తి మహ్మద్‌ అబ్దుల్‌ రఫీ శుక్రవారం తీర్పు వెల్లడించారు. నిందితుడు సునీల్‌కుమార్‌(40)కు 21 ఏళ్ల కఠిన కారాగార శిక్ష, రూ.11 వేల జరిమానా విధించారు. ఎస్పీ సునీల్‌దత్‌ ఈ వివరాలను తెలిపారు. దొడ్డా సునీల్‌కుమార్‌ లక్ష్మీదేవిపల్లి మండలంలోని ఓ ప్రాథమిక పాఠశాలలో సెకండరీ గ్రేడ్‌ ఉపాధ్యాయుడు. గతేడాది కరోనా ప్రభావంతో పాఠశాలలు మూతపడిన సమయంలో చదువు పేరిట కొందరు బాలికలను తరచూ పాఠశాలకు రప్పించేవాడు. అతడు తమపై  లైంగికదాడికి పాల్పడినట్లు అయిదుగురు బాలికలు డిసెంబరు 14న తల్లిదండ్రులకు చెప్పారు. తల్లిదండ్రుల ఫిర్యాదుతో ఎస్సై అంజయ్య మరుసటి రోజు పోక్సో కేసు నమోదు చేసి నిందితుణ్ని అరెస్టు చేశారు.