Crime News: అమాయకులకు వల.. 10మంది సైబర్‌ కేటుగాళ్ల అరెస్టు 

హైదరాబాద్‌: తెలుగు రాష్ట్రాలతో పాటు దేశవ్యాప్తంగా సైబర్‌ నేరాలకు పాల్పడుతున్న 10 మంది నిందితులను రాచకొండ సైబర్‌ క్రైం పోలీసులు అరెస్టు చేశారు. కస్టమర్‌ కేర్‌ నెంబర్లు, కేవైసీ, ఓటీపీ, యూపీఐ, ఫ్రాడ్‌ లింకులు, సిమ్‌ కార్డు, ఈ-కామర్స్‌, నకిలీ వెబ్‌సైట్లు వంటి పలు రకాల నేరాలతో అమాయక ప్రజల ఖాతాల నుంచి నగదు కాజేస్తున్న ముఠాను పోలీసులు అదుపులోకి తీసుకొని రిమాండ్‌కు తరలించారు. ఝార్ఖండ్‌లోని డియోగర్‌ జిల్లాకు చెందిన వీరంతా సాంకేతికత సాయంతో అమాయకులను బురిడీ కొట్టిస్తున్నట్లు పోలీసులు తెలిపారు. ప్రభుత్వ పథకాల పేరిట కూడా మోసాలకు పాల్పడుతున్నట్లు వెల్లడించారు. కమిషనరేట్‌ పరిధిలో నమోదైన కేసుల వివరాలతో ఝార్ఖండ్ వెళ్లిన ప్రత్యేక బృందం ఈ నిందితులను అరెస్ట్ చేసి నగరానికి తీసుకువచ్చింది.