TS News: 3 నెలల చిన్నారి, తండ్రిని కాటేసిన పాము..

మహబూబాబాద్‌ (నెహ్రూ సెంటర్‌) : మూడు నెలల చిన్నారితో పాటు తండ్రిని పాము కాటేసిన ఘటన మహబూబాబాద్‌ మున్సిపాలిటీ పరిధిలోని శనిగపురం గ్రామంలో ఆదివారం చోటు చేసుకుంది. స్థానికులు తెలిపిన వివరాల మేరకు.. గ్రామానికి చెందిన ఏకుల క్రాంతి, మమత దంపతులు.. కుమార్తె(3నెలల చిన్నారి)తో కలిసి శనివారం రాత్రి ఇంట్లో నిద్రపోయారు. ఆ సమయంలో పసికందును పాము కాటేయడంతో ఏడవటం ప్రారంభించింది. దీంతో కుటుంబ సభ్యులు ఏమైందో అని లేచి చూస్తుండగానే క్రాంతిని సైతం పాము కాటేసింది. వెంటనే వీరిరువురిని మహబూబాబాద్‌లోని ఓ ప్రైవేట్‌ ఆస్పత్రికి తరలించారు. అక్కడ చికిత్స పొందుతూ చిన్నారి మృతిచెందింది. ఇంకా పేరు పెట్టని మూడు నెలల చిన్నారి చనిపోవడంతో తల్లిదండ్రులు కన్నీరుమున్నీరుగా విలపిస్తున్నారు. క్రాంతి ఆరోగ్య పరిస్థితి నిలకడగా ఉన్నట్లు సమాచారం.