Crime News: అబ్దుల్లాపూర్‌మెట్‌ కూడలిలో లారీ బీభత్సం.. ఇంజినీరింగ్‌ విద్యార్థి మృతి

అబ్దుల్లాపూర్‌మెట్‌: హైదరాబాద్‌-విజయవాడ జాతీయ రహదారిపై అబ్దుల్లాపూర్‌మెట్‌ కూడలిలో లారీ బీభత్సం సృష్టించింది. ఈ ఘటనలో ఇంజినీరింగ్‌ విద్యార్థి మృతి చెందాడు. హైదరాబాద్‌ నుంచి విజయవాడ వైపు వెళ్తున్న లారీ అబ్దుల్లాపూర్‌మెట్‌ కూడలి వద్దకు రాగానే అదుపుతప్పి ద్విచక్రవాహనంపై వెళ్తున్న విద్యార్థిపైకి దూసుకెళ్లింది. అనంతరం రోడ్డుపక్కన ఉన్న మైసమ్మ అమ్మవారి ఆలయ ప్రహరీని ఢీ కొట్టి నిలిచిపోయింది. ఈ ప్రమాదంలో తీవ్రంగా గాయపడిన విద్యార్థి అక్కడికక్కడే మృతి చెందాడు. సమాచారం అందుకున్న  పోలీసులు ఘటనాస్థలికి చేరుకొని పరిశీలించారు. మృతుడు సిరిసిల్ల జిల్లాకు చెందిన ప్రణయ్‌ గౌడ్‌ (20)గా గుర్తించారు. ప్రణయ్‌ ..విజ్ఞాన్‌  ఇంజినీరింగ్‌ కళాశాలలో చదువుతున్నట్టు సమాచారం. ఈ మేరకు పోలీసులు కేసు నమోదు చేసి దర్యాప్తు చేపట్టారు.