Viveka murder case: వివేకా హత్యకేసులో మరో నిందితుడు అరెస్టు

కడప: మాజీ మంత్రి వైఎస్‌ వివేకానందరెడ్డి హత్యకేసులో సీబీఐ దర్యాప్తు కొనసాగుతోంది. ఈకేసులో సీబీఐ అధికారులు ఎట్టకేలకు మరో నిందితుడిని అరెస్టు చేశారు. సింహాద్రిపురం మండలం కుంచేకులవాసి ఉమాశంకర్‌రెడ్డిని ఉదయం నుంచి విచారించిన అధికారులు సాయంత్రం అరెస్టు చేస్తున్నట్టు ప్రకటించారు. వివేకా పొలం పనులు చూసే జగదీశ్వర్‌రెడ్డి సోదరుడే ఉమా శంకర్‌రెడ్డి అని సీబీఐ అధికారులు వెల్లడించారు. ఈకేసులో ఇప్పటికే సునీల్‌ యాదవ్‌ను అరెస్టు చేసిన విషయం తెలిసిందే. ఉమాశంకర్‌రెడ్డిని సీబీఐ అధికారులు పులివెందుల కోర్టులో హాజరుపర్చగా న్యాయస్థానం ఈనెల 23వరకు రిమాండ్‌ విధించింది. దీంతో అతన్ని పులివెందుల నుంచి కడప జిల్లా జైలుకు తరలించారు.