Crime News: రోడ్డు ప్రమాదంలో నవవధువు.. ఆమె తండ్రి దుర్మరణం

కడెం: రోడ్డు ప్రమాదంలో నవవధువుతో పాటు ఆమె తండ్రి మృతిచెందిన ఘటన నిర్మల్‌ జిల్లా కడెం మండలంలో చోటు చేసుకుంది. వివరాల్లోకి వెళితే.. కడెం మండలం పాత మద్దిపడగ గ్రామానికి చెందిన ఓ యువతికి మహారాష్ట్రలోని బల్లార్ష మండలం రాజురాకు చెందిన యువకుడితో ఈ నెల 25న వివాహం జరిగింది. ఈ క్రమంలో శుక్రవారం పెళ్లికొడుకు ఇంటివద్ద విందు భోజన కార్యక్రమాన్ని నిర్వహించారు. కార్యక్రమాన్ని ముగించుకొని తిరుగుపయనమయ్యారు. అర్ధరాత్రి ఒంటిగంట సమయంలో కడెం మండలం పాండ్వాపూర్‌ వద్దకు రాగానే వారు ప్రయాణిస్తున్న వాహనం ఒక్కసారిగా వంతెనను ఢీకొట్టి బోల్తా పడింది. ఈ ఘటనలో పెళ్లికూతురు మౌనిక, ఆమె తండ్రి రాజయ్య మృతి చెందారు. పెళ్లి కొడుకుతో పాటు పలువురికి గాయాలయ్యాయి. కాసేపట్లో ఇంటికి చేరుకుంటారనగా జరిగిన ప్రమాదం పెళ్లింట తీరని విషాదం నింపింది.