Crime News: గండి మైసమ్మ వద్ద ఘోర ప్రమాదం: ఒకరు మృతి

మేడ్చల్‌: గండి మైసమ్మ నుంచి మియాపూర్‌ వెళ్లే ప్రధాన రహదారిపై ఘోర ప్రమాదం జరిగింది. బాచుపల్లి నుంచి గండి మైసమ్మ వైపు వెళ్తోన్న కారు బౌరంపేట కోకాకోలా కంపెనీ వద్ద ఎదురుగా వస్తోన్న లారీని బలంగా ఢీకొట్టింది. ఈ ప్రమాదంలో కారులో ప్రయాణిస్తున్న శంకర్‌ రెడ్డి  అక్కడికక్కడే మృతిచెందాడు. ప్రమాదంలో కారు నుజ్జునుజ్జు కాగా అతని మృతదేహం అందులోనే ఇరుక్కుపోయింది. ప్రమాద సమయంలో వెనుక నుంచి వస్తున్న ఓ ద్విచక్రవాహనదారుడికి స్వల్పగాయాలయ్యాయి. సమాచారం అందుకున్న పోలీసులు ఘటన స్థలికి చేరుకుని సుమారు గంటపాటు శ్రమించి మృతదేహాన్ని బయటకు తీశారు. పోస్టుమార్టం నిమిత్తం మృతదేహాన్ని ఆసుపత్రికి తరలించారు. ప్రమాదానికి గల కారణాలపై పోలీసులు ఆరా తీస్తున్నారు. మృతుడు కూకట్‌పల్లి వాసిగా గుర్తించారు.