Viveka Murder Case: మళ్లీ మొదలైన సీబీఐ విచారణ.. హాజరైన భరత్‌కుమార్‌ యాదవ్‌

కడప: మాజీ మంత్రి వైఎస్‌ వివేకానందరెడ్డి హత్య కేసులో సీబీఐ విచారణ దాదాపు నెలన్నర తర్వాత మళ్లీ మొదలైంది. కడపలోని కేంద్ర కారాగారం అతిథి గృహంలో సీబీఐ అధికారులు విచారణ చేపట్టారు. విచారణకు పులివెందులకు చెందిన సునీల్‌ యాదవ్‌ బంధువు భరత్‌ కుమార్‌ యాదవ్‌ హాజరయ్యారు. వివేకా అల్లుడు రాజశేఖర్‌రెడ్డిపై భరత్‌కుమార్‌ ఆరోపణలు చేశారు. ఇతడిని సీబీఐ గతంలో చాలా సార్లు ప్రశ్నించినప్పటికీ తాజాగా మరోసారి ప్రశ్నిస్తుండటం గమనార్హం.

వివేకా అల్లుడు రాజశేఖర్‌రెడ్డి.. వివేకా హత్యకు కుట్ర పన్నారని ఆరోపిస్తూ గత నెల 21న భరత్‌కుమార్‌ సీబీఐ డైరెక్టర్‌కు లేఖ రాశారు. దీంతో పాటు మీడియా ముందుకు వచ్చి కూడా ఈ కేసుకు సంబంధించి అన్ని విషయాలు తనకు తెలుసని చెప్పారు. ఈ పరిణామాల నేపథ్యంలోనే భరత్‌కుమార్‌ను సీబీఐ అధికారులు విచారణకు పిలిచినట్లు తెలుస్తోంది.