Fire Accident: కృష్ణా జిల్లా.. ప్లాస్టిక్‌ కంపెనీలో అగ్నిప్రమాదం

గన్నవరం: కృష్ణా జిల్లా గన్నవరం మండలం వీరపనేనిగూడెం పారిశ్రామికవాడ సమీపంలో అగ్నిప్రమాదం జరిగింది. తెంపల్లి శివారులోని శ్రీవిద్య పాలిమర్స్‌ ప్లాస్టిక్‌ కర్మాగారంలో శుక్రవారం తెల్లవారుజామున ఒక్కసారిగా మంటలు ఎగిసిపడ్డాయి. విద్యుదాఘాతంలో మంటలు వ్యాపించాయి. సమాచారం అందుకున్న గన్నవరం అగ్నిమాపక సిబ్బంది, ఆత్కూరు పోలీసులు ఘటనాస్థలానికి చేరుకుని మంటలను ఆర్పే ప్రయత్నం చేశారు. ఈ ఘటనతో పరిసర ప్రాంతాల్లో దట్టంగా పొగలు కమ్మేశాయి. విపరీతంగా పొగలు రావడంతో స్థానికులు భయాందోళనకు గురయ్యారు. ప్రమాదం జరిగిన సమయంలో అందులో కార్మికులెవరూ లేకపోవడంతో ప్రాణ నష్టం తప్పింది. ఈ ఘటనలో రూ.కోట్లలో నష్టం వాటిల్లినట్లు పోలీసులు, యాజమాన్యం అంచనా వేస్తున్నాయి.