TS News: మెదక్‌ జిల్లాలో కల్తీ కల్లు కలకలం: 10 మందికి అస్వస్థత

తూప్రాన్‌: కల్తీ కల్లు తాగి 10 మంది అస్వస్థతకు గురైన ఘటన మెదక్‌ జిల్లా తూప్రాన్‌, శివ్వంపేట మండలాల్లో మంగళవారం చోటు చేసుకుంది. వివరాల్లోకి వెళితే.. శివ్వంపేట మండలం కొంతాన్‌పల్లికి చెందిన ఓ వ్యక్తి కొంతాన్‌పల్లితోపాటు తూప్రాన్‌ మండలంలోని వట్టూర్‌ గ్రామంలో కల్లు దుకాణాలు నిర్వహిస్తున్నాడు. సోమవారం వట్టూర్‌లో శివకుమార్‌, యాదగిరి, కొమరయ్య, మహేశ్‌, వరలక్ష్మి, శివ్వంపేట మండలం కొంతాన్‌పల్లిలో వెంకటేశ్‌, నాగరాజు, రమేశ్‌, పోతులగూడెంకు చెందిన మరో ఇద్దరు ఆయా గ్రామాల్లో కల్లు సేవించారు. మంగళవారం తెల్లవారుజాము నుంచి వీరంతా వాంతులు, విరేచనాలతో తీవ్ర అస్వస్థతకు గురయ్యారు. కాళ్లు, చేతులు, మెడ, నోరు వంకర్లు తిరిగాయి. గమనించిన కుటుంబసభ్యులు వీరిని తూప్రాన్‌లోని ఓ ప్రైవేటు ఆసుపత్రికి తరలించి చికిత్స అందించారు. 

వీరిలో కొంతాన్‌పల్లికి చెందిన నాగరాజు, వెంకటేశ్‌ల ఆరోగ్య పరిస్థితి విషమంగా ఉండటంతో మెరుగైన చికిత్స కోసం హైదరాబాద్‌లోని ప్రైవేటు ఆసుపత్రికి తరలించారు. కల్లులో మోతాదుకు మించి రసాయనాలు వినియోగించడం వల్లే వీరంతా అస్వస్థతకు గురైనట్లు స్థానికులు అనుమానం వ్యక్తం చేస్తున్నారు. అబ్కారీ శాఖ అధికారుల పర్యవేక్షణ లేకపోవడంతో కల్లు దుకాణాల్లో అధిక మోతాదులో రసాయనాలు వినియోగిస్తున్నారని, అందువల్లే తరచూ ఇలాంటి ఘటనలు చోటు చేసుకుంటున్నాయని ప్రజలు మండిపడుతున్నారు.