కొండచరియలు విరిగి పడి 12 మంది మృతి

ముంబయి: మహారాష్ట్రలో భారీ వర్షాల వల్ల చెంబూరులో కొండచరియలు విరిగి పడ్డాయి. భరత్‌నగర్‌ ప్రాంతంలోని నివాసాలపై ఈ కొండచరియలు పడటంతో గోడలు కూలి 12 మంది మృతిచెందారు. స్థానికులు సమాచారంతో ఘటనాస్థలికి చేరుకున్న ఎన్డీఆర్‌ఎఫ్ సిబ్బంది గోడ కింద చిక్కుకున్న పలువురిని కాపాడారు. మృతుల సంఖ్య పెరిగే అవకాశం ఉందని అధికారులు తెలిపారు. ఘటనాస్థలిలో సహాయక చర్యలు కొనసాగుతున్నట్లు వివరించారు.

భవనం కూలి ముగ్గురి మృత్యువాత..

ముంబయి నగరాన్ని భారీ వరదలు ముంచెత్తాయి. లోతట్టు ప్రాంతాలు జలమయమయ్యాయి. నగరంలోని విఖ్రోలి ప్రాంతంలో ఓ భవనం కూలి ముగ్గురు మృత్యువాతపడ్డారు. భారీ వర్షాల ధాటికి భవనం కూలినట్లు బీఎంసీ అధికారులు వెల్లడించారు. దీంతో పాటు బోరివాలిలో పార్కింగ్ చేసిన వాహనాలు కొట్టుకుపోయాయి.