Crime News: పెద్దలను కాదనలేక.. ప్రేమను చంపుకోలేక యువ జంట బలవన్మరణం

తిరుమలగిరి: నల్గొండ జిల్లా తిరుమలగిరి మండలం తెట్టేకుంట గ్రామంలో విషాదం చోటు చేసుకుంది. పెద్దలను కాదనలేక.. ప్రేమను చంపుకోలేక యువ జంట బలవన్మరణానికి పాల్పడింది. క్రిమిసంహారక మందు తాగి ప్రేమికులు ఆత్మహత్య చేసుకున్న ఘటన ఆలస్యంగా వెలుగులోకి వచ్చింది. తెట్టేకుంట గ్రామానికి చెందిన మిట్టపల్లి కొండల్‌ (22), సంధ్య (19) గత కొంతకాలంగా ప్రేమించుకుంటున్నారు. ఇటీవల సంధ్యకు వేరొకరితో వివాహం నిశ్చయించారు. పెద్దలమాట కాదనలేక, ప్రేమ విషయం చెప్పలేక కుమిలిపోయారు. దీంతో ఇద్దరూ కలిసి 3రోజుల క్రితం కొండల్‌ ఇంట్లో ఎవరూ లేని సమయంలో పురుగుల మందు తాగి ఆత్మహత్యకు యత్నించారు. గమనించిన కుంటుంబ సభ్యులు చికిత్స నిమిత్తం నల్గొండ ఆసుపత్రికి తరలించగా అక్కడ చికిత్స పొందుతూ ఇద్దరూ మృతి చెందారు. పోస్టుమార్టం నిమిత్తం మృతదేహాలను సాగర్‌ ఆసుపత్రికి తరలించారు.