Crime News: విజయవాడ.. పార్క్‌ చేసిన కారులో మృతదేహం కలకలం

విజయవాడ: విజయవాడ నగరంలో కారులో ఓ వ్యక్తి మృతదేహం కనిపించడం కలకలం రేపింది. మ్యానర్‌ ఫుడ్‌ ప్లాజా ఎదురు రోడ్డులో పార్కు చేసి ఉన్న కారులో మృతదేహాన్ని పోలీసులు గుర్తించారు. మృతుడిని జడ్‌ఎక్స్‌ఎన్‌ సిలిండర్ల కంపెనీ యజమాని, తాడిగడపకు చెందిన రాహుల్‌గా నిర్ధరణకు వచ్చారు. జి. కొండూరు మండలం చెరువు మాధవరంలో ఆయన కంపెనీ ఉంది. బుధవారం సాయంత్రం 7.30 గంటలకు ఇంటి నుంచి వెళ్లిన ఆయన తిరిగి రాకపోవడంతో కుటుంబసభ్యులు గురువారం ఉదయం పెనమలూరు పోలీస్‌స్టేషన్‌లో ఫిర్యాదు చేశారు. పోలీసులు టవర్‌ లొకేషన్‌ పరిశీలించగా మ్యానర్‌ ఫుడ్‌ ప్లాజా ఎదురుగా చూపించింది. వెంటనే పోలీసులు అక్కడికి వచ్చి చూస్తే కారులో మృతదేహం కనిపించింది. హత్య, ఆత్మహత్య అనే కోణంలో పోలీసులు క్లూస్‌ టీం సహాయంతో విచారణ చేపట్టారు. ఈ ఘటనపై అనుమానాస్పద మృతిగా పోలీసులు కేసు నమోదు చేసి దర్యాప్తు చేస్తున్నారు. ఘటనాస్థలాన్ని ఇన్‌ఛార్జ్‌ సీపీ పాలరాజు పరిశీలించారు.