Crime news : సంతానం కోసం భార్యాభర్తల అమానుషం.. యువతిని 16 నెలలు బంధించి..!

ఉజ్జయిని: మధ్యప్రదేశ్​లోని ఉజ్జయినిలో అమానుష ఘటన చోటుచేసుకుంది. సంతానం కోసమని ఓ యువతిని బంధించిన ఓ వ్యక్తి ఆమెపై 16 నెలలుగా అత్యాచారానికి పాల్పడ్డాడు. ఇందుకు అతడి భార్య సహకరించడం గమనార్హం.  చివరకు శిశువు జన్మించాక బాధితురాలిని ఈనెల 6న ఓ బస్టాప్​ వద్ద పడేసి పరారయ్యాడు. బాధితురాలి ఫిర్యాదు మేరకు కేసు నమోదు చేసిన పోలీసులు నిందితుడిని అరెస్టు చేశారు.

పోలీసుల వివరాల ప్రకారం.. ఉజ్జయినిలోని కథ్‌ బరోడా గ్రామానికి చెందిన రాజ్‌​పాల్​ సింగ్​ (38), చంద్రకాంత (26) దంపతులు. రాజ్‌పాల్‌ గతంలో ఉపసర్పంచిగా పనిచేశాడు. అయితే వారికి పుట్టిన ఇద్దరు పిల్లలు కూడా మృతిచెందారు. దీంతో సంతానం పొందాలని భావించిన ఆ జంట.. 16 నెలల క్రితం మహారాష్ట్రలోని నాగ్​పుర్​లో ఓ మహిళ వద్ద నుంచి ఓ యువతి(21)ని కొనుగోలు చేశారు. అప్పటి నుంచి బాధితురాలిని వారి ఇంట్లోనే బందీగా ఉంచి రాజ్​పాల్​ సింగ్​ అనేక సార్లు అత్యాచారానికి పాల్పడ్డాడు. ఈ క్రమంలో గర్భం దాల్చిన యువతి.. గత నెల 25న శిశువుకు జన్మనిచ్చింది.

బస్​స్టాప్​ వద్ద పడేసి పరారు

కాగా ఈనెల 6న ఆపస్మారక స్థితిలో ఉన్న బాధితురాలిని దేవాస్​ బస్​స్టాప్​ వద్ద పడేసి రాజ్‌పాల్‌ పరారయ్యాడు. స్పృహలోకి వచ్చిన యువతి పోలీసులను ఆశ్రయించి తనపై జరిగిన అమానుషాన్ని వారికి వివరించింది. దీంతో పోలీసులు దర్యాప్తు చేపట్టారు. ఆమె ఇచ్చిన వివరాల ప్రకారం రాజ్​పాల్​ దంపతులు సహా వారి​ ముగ్గురు బంధువులపైనా కేసు నమోదు చేశారు. మానవ అక్రమ రవాణాకు కూడా పాల్పడినట్లు కేసులో పేర్కొన్న పోలీసులు.. బాధితురాలిని విక్రయించిన వారి వివరాలు సేకరించేందుకు యత్నిస్తున్నారు. ప్రధాన నిందితుడు రాజ్​పాల్​ను అరెస్ట్​ చేశారు. మిగతా వారిని త్వరలోనే పట్టుకుంటామని వెల్లడించారు.