Crime News: శిల్పాచౌదరిని ప్రశ్నిస్తున్న నార్సింగ్‌ పోలీసులు... వివరాలు రాబట్టేందుకు యత్నం

హైదరాబాద్‌: పెట్టుబడుల పేరుతో మోసానికి పాల్పడినట్టు ఆరోపణలు ఎదుర్కొంటున్న శిల్పా చౌదరిని నార్సింగి పోలీసులు ప్రశ్నిస్తున్నారు. చంచల్‌గూడ మహిళా జైల్లో రిమాండ్‌ ఖైదీగా ఉన్న శిల్పా చౌదరిని 3 రోజుల కస్టడీలోకి తీసుకున్న పోలీసులు గోల్కొండ ఏరియా ఆసుపత్రిలో వైద్య పరీక్షలు చేయించారు. అనంతరం నార్సింగ్‌ ఎస్‌ఓటీ కార్యాలయానికి తీసుకెళ్లారు. శిల్పా చౌదరిపై నార్సింగ్‌ పీఎస్‌లో 3 కేసులు నమోదయ్యాయి. రూ.7కోట్లు మోసం చేసినట్టు పోలీసులు ప్రాథమికంగా గుర్తించారు. మరి కొంత మంది నుంచి డబ్బులు తీసుకొని ఎగ్గొట్టినట్టు  పోలీసులు అనుమానిస్తున్నారు. శిల్పా ఇంట్లో నుంచి పోలీసులు ఇప్పటికే పలు పత్రాలు, బ్యాంకు ఖాతాలు స్వాధీనం చేసుకున్నారు. శిల్పా చెప్పిన వివరాల ఆధారంగా పోలీసులు పలువురికి నోటీసులు ఇచ్చే అంశాన్ని పరిశీలిస్తున్నారు. ఆమె వెనుక ఇంకెవరైనా ఉన్నారా? అనే కోణంలోనూ దర్యాప్తు చేస్తున్నారు. 3 రోజుల పాటు ప్రశ్నించి .. ఆమె వద్ద నుంచి పలు వివరాలు సేకరించేందుకు నార్సింగ్‌ పోలీసులు ప్రయత్నిస్తున్నారు.