Shalu Chourasiya: చౌరాసియాపై దాడి కేసు.. పోలీసుల అదుపులో నిందితుడు

హైదరాబాద్‌: నటి షాలూ చౌరాసియాపై దాడి కేసులో నిందితుడిని పోలీసులు అరెస్టు చేశారు. సినీ పరిశ్రమలో లైట్‌బాయ్‌గా పనిచేస్తున్న బాబు అనే వ్యక్తి ఈ దాడికి పాల్పడినట్లు పోలీసులు గుర్తించారు. యూసఫ్‌గూడ, కృష్ణానగర్‌లో నివాసం ఉంటున్న బాబు ఇంటిలో షాలూ ఐఫోన్‌ని పోలీసులు స్వాధీనం చేసుకుని.. పూర్తి వివరాలపై విచారణ చేపట్టారు. విజయవాడ, బంజారాహిల్స్‌, గోల్కొండ పీఎస్‌ల్లో అతడిపై గతంలో కేసులు నమోదైనట్లు పోలీసులు గుర్తించారు. గోల్కొండ పీఎస్‌లో నమోదైన కేసులో కొంతకాలంపాటు జైలులో కూడా ఉన్నాడు.

నటి షాలూ.. ఈ నెల 14న సాయంత్రం కేబీఆర్‌ పార్క్‌లో వాకింగ్‌కు వెళ్లింది. రాత్రి 8 ఎనిమిది గంటల సమయంలో గుర్తు తెలియని వ్యక్తి షాలూపై దాడి చేసి.. ఆమె ఐఫోన్‌ని తీసుకుని పారిపోయాడు. దీంతో షాలూ పోలీసులకు ఫిర్యాదు చేశారు. ఈ మేరకు కేసు నమోదు చేసుకున్న పోలీసులు.. దర్యాప్తు అనంతరం నిందితుడిని అరెస్ట్‌ చేశారు.