HYD: అత్యాచార ఘటన: ఆ యువతి చేసింది తప్పుడు ఫిర్యాదా?

హైదరాబాద్‌: నగరంలో దారి మళ్లించి, తనపై ఆటో డ్రైవర్‌ అత్యాచారం చేశాడని ఓ యువతి, తల్లిదండ్రులు బుధవారం సంతోష్‌నగర్‌ పోలీసులకు ఫిర్యాదు చేసిన విషయం తెలిసిందే. దీనిపై విచారణ చేపట్టిన పోలీసులకు ఘటనకు సంబంధించి ఎటువంటి ఆధారాలు లభించలేదు. దీంతో యువతి తప్పుడు ఫిర్యాదు చేసినట్లు పోలీసులు భావిస్తున్నారు. ల్యాబ్‌ టెక్నీషియన్‌గా పని చేస్తున్న యువతి.. ఈ నెల 17న ఇంటి నుంచి విధులకు వెళ్లింది. అదే రోజు రాత్రి 9.30 గంటలకు ఇంటికి రావాల్సి ఉండగా.. గంట ఆలస్యంగా రాత్రి 10.30 గంటలకు చేరింది. ఆలస్యంగా రావడంతో కుమార్తెను తల్లిదండ్రులు ప్రశ్నించారు.

తనపై ఆటో డ్రైవర్‌ అత్యాచారం చేశాడని యువతి వారికి చెప్పింది. దీంతో యువతితో పాటు తల్లిదండ్రులు పోలీసులకు ఫిర్యాదు చేశారు. అయితే దీనిపై విచారణ చేపట్టిన పోలీసులు.. యువతి ఆటో ఎక్కిన సమయం, ఆమె చెప్పే అంశాలకు పొంతన లేదని నిర్ధరణకు వచ్చారు. యువతిది తప్పుడు ఫిర్యాదుగా భావించిన పోలీసులు ఆమెను పూర్తిస్థాయిలో ప్రశ్నిస్తున్నారు. యువతికి వైద్య పరీక్షలు నిర్వహించగా ఆమెపై అత్యాచారం జరగలేదని తేలినట్లు సమాచారం.