Crime News: పండుగ వేళ కృష్ణా జిల్లాలో ఘోర ప్రమాదం.. ఇద్దరు యువకుల మృతి

పామర్రు: దీపావళి పండుగ రోజు కృష్ణా జిల్లాలో ఘోర రోడ్డు ప్రమాదం జరిగింది. అతి వేగం ఇద్దరు యువకుల ప్రాణాలు బలిగొంది. వారి తప్పేమీ లేకపోయినా నిర్లక్ష్యపు డ్రైవింగ్‌కు నిండు ప్రాణాలు గాలిలో కలిసిపోయాయి. ఈ ఘటన కృష్ణా జిల్లా పామర్రు మండలం కాపవరం వద్ద గురువారం సాయంత్రం చోటు చేసుకుంది. 

పోలీసులు తెలిపిన వివరాల ప్రకారం.. మచిలీపట్నం వైపు నుంచి పామర్రు వస్తున్న కారు కాపవరం వద్దకు రాగానే అదుపుతప్పి డివైడర్‌ను ఢీకొట్టింది. కారు అతివేగంతో వస్తుండడంతో డివైడర్‌ను ఢీకొట్టిన అనంతరం పల్టీలు కొడుతూ ఎదురుగా పామర్రు నుంచి నిమ్మకూరు వైపు వెళ్తున్న ద్విచక్రవాహనాన్ని ఢీకొట్టింది. ఈ ప్రమాదంలో బైక్‌పై వెళ్తున్న మొవ్వ మండలం కాజ గ్రామానికి చెందిన కామేశ్వర్‌రెడ్డి (24), మోదుగుమూడి ఉమాకాంత్‌ (20) అక్కడికక్కడే ప్రాణాలు కోల్పోయారు. కారులో ప్రయాణిస్తున్న ముగ్గురు తీవ్రంగా గాయపడ్డారు. సమాచారం తెలుసుకున్న పోలీసులు ఘటనా స్థలికి చేరుకుని క్షతగాత్రులను అంబులెన్స్‌లో మచిలీపట్నం ప్రభుత్వ ఆస్పత్రికి తరలించారు. గాయపడిన వారి పరిస్థితి విషమంగా ఉన్నట్లు పోలీసులు తెలిపారు. ఈ ప్రమాదంలో కారు పూర్తిగా దగ్ధమైంది.